EPF, EPS contribution limit may be hiked to Rs 21,000 soon, How it can impact you : कर्मचारी भविष्य निर्वाह निधीमध्ये खाते असलेल्या (EPF) कोट्यवधी ग्राहकांसाठी महत्त्वाची बातमी आहे. केंद्र सरकार लवकरच EPF योजनेंतर्गत वेतन मर्यादा सध्याच्या 15,000 रुपयांवरून 21,000 रुपयांपर्यंत करण्याची शक्यता आहे. सरकारने शेवटची वेतन मर्यादा सप्टेंबर 2014 मध्ये 6,500 रुपयांवरून 15,000 रुपये केली होती. पगार मर्यादेत वाढ झाल्यानंतर कर्मचाऱ्यांकडून EPF आणि कर्मचारी पेन्शन योजना (EPS) मध्ये केल्या जाणाऱ्या योगदानावर परिणाम होणार. यामुळे अधिक कर्मचारी ईपीएस पेन्शन योजनेत येण्याची शक्यता आहे. EPF वेतन मर्यादा वाढल्याने तुमच्यावर काय परिणाम होईल हे जाणून घ्या.

कर्मचाऱ्यांच्या पगारात काय बदल होणार?
केंद्र सरकार ईपीएफ मर्यादा 15,000 रुपयांवरून 21,000 रुपये करण्याचा विचार करत आहे. त्यामुळे कर्मचाऱ्यांना अधिक पेन्शन आणि भविष्य निर्वाह निधी मिळेल. मात्र पगारवाढीमुळे कर्मचाऱ्यांच्या नेट सॉलरीत म्हणजेच हातात येणाऱ्या पगारात थोडीशी कपात होणार आहे.


कर्मचारी आणि नियोक्ता दोघांचे योगदान वाढेल
सध्या EPF साठी किमान पगार मर्यादा 15,000 रुपये आहे. आता जर किमान पगार मर्यादा 21,000 रुपये झाली तर कर्मचारी आणि नियोक्ता दोघांचे कर्मचारी भविष्य निर्वाह निधी (EPF) आणि कर्मचारी निवृत्ती वेतन योजना (EPS) मध्ये योगदान वाढेल.






कर्मचाऱ्यांना काय फायदा होणार?
एक म्हणजे कर्मचाऱ्यांची वेतन मर्यादा वाढवल्याने कर्मचाऱ्यांचे पेन्शन योगदानात वाढ होईल. म्हणजे कर्मचाऱ्यांना निवृत्तीनंतर चांगली पेन्शन मिळेल. दुसरा फायदा म्हणजे, कर्मचाऱ्यांना उत्तम भविष्य निर्वाह निधी मिळेल. म्हणजेच EPF मध्ये अधिक योगदान केल्याने कर्मचाऱ्यांचा निवृत्ती निधी देखील वाढेल आणि तो भविष्यात त्यांच्या आर्थिक सुरक्षिततेसाठी फायदेशीर ठरेल.


कर्मचाऱ्यांचे काय नुकसान होऊ शकते?
वेतन मर्यादा वाढवल्यानंतर कर्मचाऱ्यांच्या नेट पगार कपात होऊ शकते. EPF कायद्यानुसार कर्मचाऱ्यांचे योगदान 12% असावे. जे आता वाढलेल्या मर्यादेनुसार वाढेल. उदाहरणार्थ जर एखाद्या कर्मचाऱ्याचा पगार 23,000 रुपये असेल, तर त्याचे EPF मध्ये योगदान 12% असेल. म्हणजे दरमहा सुमारे 2,760 रुपये होतात. यामुळे कर्मचाऱ्यांच्या निव्वळ पगारात घट होणार आहे. परंतु या वाढीव योगदानामुळे कर्मचाऱ्यांना भविष्यात पेन्शन आणि बचतीचे फायदे मिळतील.






निवृत्तीनंतर पेन्शनचा आकडा किती असेल?
समजा तुमचे वय सध्या 35 वर्षे आहे आणि तुम्हाला वयाच्या 58 व्या वर्षी निवृत्त व्हायचे असेल तर सध्याची मर्यादा आणि नवीन मर्यादा यांच्यातील पेन्शनमध्ये मोठा फरक असेल. तुमचा पगार 23,000 रुपये असेल आणि EPF मर्यादा 21,000 रुपयांपर्यंत वाढली असेल तर निवृत्तीच्या वेळी तुमचे पेन्शन सुमारे 6,900 रुपये असू शकते, पूर्वी ते सुमारे 4,929 रुपये होते.


कर्मचाऱ्यांना दीर्घकालीन फायदा होईल
निवृत्ती वेतन आणि भविष्य निर्वाह निधीमध्ये पगार मर्यादेत वाढ केल्याने कर्मचाऱ्यांना दीर्घकालीन फायदा होईल. मात्र, यामुळे कर्मचाऱ्यांना सध्या पगार कपातीचा सामना करावा लागणार आहे. हे लक्षात घेऊन कर्मचाऱ्यांनी त्यांच्या आर्थिक योजनांवर पुनर्विचार करणे आणि चांगल्या भविष्यासाठी त्यांच्या बचतीचे आयोजन करणे आवश्यक आहे.