Health News: आपल्या शरीराला व्यायामची गरज असते. सोबतच जर का आपण व्यायाम केला नाही तर लठ्ठपणा वाढू शकतो. जो आपल्यासाठी नक्कीच घातक ठरू शकतो. यामुळे मधुमेहाचा त्रासही वाढू शकतो. तेव्हा तुम्ही एकाच जागी बसून जास्त वेळ काम करत असाल तर तुम्हाला त्यामुळे मधुमेहाचाही धोका निर्माण होऊ शकतो. तेव्हा नियमितपणे चालणे, धावणे किंवा मॉर्निंग वॉक करणे फारच महत्त्वाचे असते. निदान तुम्ही ब्रिस्ट वॉकिंग करत असाल तर त्याचाही तुम्हाला चांगलाच फायदा मिळेल.

परंतु तुम्हाला जास्त वेळ एकाच ठिकाणी बसण्याची सवय लागली असेल तर मग ती प्रचंड वाईट आहे. कारण यामुळे तुम्हाला मधुमेहाचा त्रास सतावू शकतो. तेव्हा आपल्याला याकडे दुर्लक्ष करून चालणार नाही. एकाच जागी बसून जास्त वेळ काम करत असाल तर टाइप 2 मधुमेहाचा धोका वाढू शकतो. कमी झालेल्या इंसुलिनची संवेदनशीलता आणि बिघडलेले ग्लुकोज चयापचय यामुळे हा आजार बळकावतो. अशावेळी रोज सकाळी व्यायाम किंवा योगा करावा.

एकाच जागी बसून राहिल्याने कोणते आजार होतात? काय उपाय करावेत...
1) जास्त वेळ एकाच जागी बसून काम केल्याने वजन वाढू शकते. वजन वाढल्याने अनेक आजार निर्माण होऊ शकतात. एकाच जागी बसल्याने कॅलरीज बर्न होत नाही. यासाठी रोजच्या दिनचर्येत व्यायाम आणि योग करावा.
2) दीर्घकाळ बसून काम केल्याने हृदयविकार आणि स्ट्रोकसह हृदय व रक्तवाहिन्यासंबंधी आजार वाढू शकतात. यासाठी काम करताना एका तासाने उभे राहावे किंवा चालावे. हृदयाचे आरोग्य निरोगी ठेवण्यासाठी व्यायाम करणे महत्त्वाचे आहे.
3) जास्त वेळ बसून काम केल्याने पाठ वाकणे, मणक्याचा त्रास सुरू होऊ शकतो. सोबतच पाठदुखी, सांधेदुखी असेही आजार वाढू शकतात. यामुळे काम करताना ताठ बसावे. बसायला योग्य खुर्ची घ्यावी. काम करण्यासाठी एक जागा निश्चित करावी तसेच काम करताना 5 ते 10 मिनिटांची विश्रांती घेऊन फिरून यावे.

खास मोहीम
मुंबईत मधुमेह, उच्च रक्तदाब, हृदयरोग यांसारख्या असंसर्गजन्य आजारांचे प्रमाण झपाट्याने वाढत आहे. नागरिकांमधील व्यायामाचा अभाव आणि आहाराच्या चुकीच्या सवयी या कारणांमुळे या आजाराचे प्रमाण वाढत असल्याचे कळते. प्रौढ वर्गामध्ये मधुमेहाचा टाइप 2 हा प्रकार वाढतोय. महानगरपालिकेच्या सार्वजनिक आरोग्य विभागामार्फत जागतिक मधुमेह दिननिमित्ताने म्हणजेच आज 14 नोव्हेंबर 2024 पासून मधुमेह आणि आहारविषयक जनजागृती राबविण्यात येणार आहे. मधुमेह दिनाची यंदाच्या वर्षीची संकल्पना 'ब्रेकिंग बॅरिअर्स, ब्रिजिंग गॅप्स' ही आहे. महानगरपालिकेच्या हिंदुहृदयसम्राट बाळासाहेब ठाकरे आपला दवाखाना व इतर दवाखान्यामध्ये एक लाखाहून अधिक रुग्ण मधुमेह व उच्च रक्तदाबाकरिता उपचार घेत आहेत, अशी माहिती कळते.

काय सांगतं सर्वेक्षण?
जागतिक आरोग्य संघटना व बृहन्मुंबई महानगरपालिका यांनी संयुक्तपणे मुंबईमध्ये केलेल्या स्टेप्स सर्वेक्षणानुसार, 18 ते 69 वर्ष या वयोगटातील सुमारे 18 टक्के व्यक्तींमध्ये उपाशीपोटी असताना रक्तातील साखरेचे प्रमाण 126 मिलिग्रॅमपेक्षा अधिक वाढलेले आढळले आहे. प्री-डायबेटिसची टक्केवारी 15 टक्के आहे. लठ्ठ आणि बैठे काम करणाऱ्या व्यक्तींमध्ये टाइप 2 मधुमेहाचा धोका अधिक असतो.

पालिकेच्या माध्यमातून आहारविषयक समुपदेशन सेवा सर्व दवाखान्यांत सुरू आहे. त्यामध्ये 55 हजारांपेक्षा अधिक मधुमेही व रक्तदाब रूग्णांना सल्ला देण्यात आला आहे. 'विशेष रक्तदाब आणि मधुमेह तपासणी केंद्र' ऑगस्ट 2022 पासून 26 रूग्णालयांमध्ये सुरू करण्यात आले.यामध्ये 30 वर्षांवरील व्यक्तींचे मधुमेह आणि रक्तदाबासाठी सर्वेक्षण केले जाते. ऑक्टोबर 2024 पर्यंत 4 लाख 25 हजार व्यक्तींची तपासणी करण्यात आली असून ज्यांना मधुमेह आहे असं वाटतंय त्यांचा पाठपुरावा करून आवश्यकता असल्यास पुढील उपचारासाठी संदर्भित करण्यात आले आहे.