ठाकरेंच्या शिवसेनेचे नेते संजय राऊत यांनी भाजपवर हल्लाबोल केला आहे. तसंच देवेंद्र फडणवीस खोटं बोलत असल्याचा आरोपही त्यांनी केला आहे. पत्रकार परिषदेत बोलताना राऊत म्हणाले, "अडीच वर्ष तुम्ही शिवसेनेतल्या एका गद्दाराला मुख्यमंत्री केलं. पण शिवसेनेबरोबर 25 वर्ष युती असताना शिवसेनेचा मुख्यमंत्री करण्यास नकार दिला. त्यामुळे फडणवीस खोट बोलत आहेत. मी त्या चर्चेच्या प्रक्रियेमध्ये होतो. मुख्यमंत्रिपदाबाबत हे चर्चाच करायला तयार नव्हते या संदर्भात कोणतीही चर्चा होणार नाही, हे वारंवार सांगितलं जात होतं."

शिवसेना ठाकरे गटाचे प्रमुख उद्धव ठाकरे यांची आज सिल्लोडमध्ये जाहीर सभा होणार आहे. शिवसेनेचे उमेदवार सुरेश बनकर यांच्या प्रचारार्थ ही सभा आयोजित केली आहे.

राष्ट्रवादी काँग्रेस (अजित पवार) पक्षाचे नेते नवाब मलिक यांचा जामीन रद्दवर तात्काळ सुनावणी करण्याची मागणी हायकोर्टाने फेटाळली आहे. त्यामुळे आता पुढील सुनावणी 4 डिसेंबरला होणार आहे.

विधानसभा निवडणुकीसाठी आज महाराष्ट्र नवनिर्माण सेनेचा जाहीरनामा प्रसिद्ध होणार आहे. राज ठाकरेंच्या हस्ते तो प्रसिद्ध केला जाणार आहे. तर या जाहीरनाम्याच्या माध्यमातून मनसे जनतेला काय आश्वासन देणार याकडे सर्वांच्या नजरा लागल्या आहेत.