सातपूर : नाशिक पश्चिम विधानसभा मतदारसंघाचे मनसेचे उमेदवार दिनकर पाटील यांच्या प्रचारार्थ मनसे अध्यक्ष राज ठाकरे यांची शनिवारी (ता. १६) सिडको आणि सातपूरमध्ये सभा होत आहे. सातपूर, अशोकनगर येथील शिवजन्मोत्सव मैदान (जाणता राजा) येथे सायंकाळी ५ वाजता, तर सिडको, पवननगर स्टेडिअम येथे सायंकाळी ७ वाजता सभा होणार आहे. कधीकाळी बालेकिल्ला असलेला नाशिक पश्चिम मतदारसंघ काबीज करण्यासाठी राज ठाकरे पुन्हा एकदा मैदानात उतरणार आहेत. (Raj Thackeray meeting at CIDCO and Satpur tomorrow for assembly election)

मतदारसंघात मनसेकडून दिनकर पाटील मैदानात असून, त्यांना मतदारांचा मिळत असलेला पाठिंबा बघता मनसेमध्ये चैतन्य निर्माण झाले आहे. मनसेनी जिल्ह्यात पाच उमेदवार दिले असले तरी, राज ठाकरे नाशिक पश्चिममध्येच एकाच दिवशी दोन सभा घेणार आहेत. राज्यातील विविध भागात होत असलेल्या राज ठाकरे यांच्या सभा गाजत असून, त्यांच्याकडून सभांमधून राज्यातील राजकारणावर तीव्र शब्दात ताशेरे ओढले जात आहेत. त्यामुळे नाशिकच्या सभेत ते कोणावर बाण सोडणार याकडे लक्ष लागून आहे. दरम्यान, या सभेसाठी उमेदवार दिनकर पाटील व मनसे पदाधिकारी, कार्यकर्त्यांकडून जोरदार तयारी केली जात आहे. सभेसाठी नागरिकांनी मोठ्या संख्येनी उपस्थित राहावे असे आवाहन मनसेकडून करण्यात आले आहे. ()