बॉर्डर गावस्कर कसोटी मालिकेत जसप्रीत बुमराह सातत्यपूर्ण कामगिरी करत आहे. कांगारूंना सर्वाधिक भिती कोणाची वाटत असेल तर ती जसप्रीत बुमराहची.. कारण या मालिकेत त्याने सर्वाधिक विकेट घेत ऑस्ट्रेलियाला दणका दिला आहे. असं असताना या वर्षाच्या सुरुवातीला जसप्रीत बुमराहच्या शिरपेचात आणखी एक मानाचा तुरा खोवला गेला आहे. गेल्या काही दिवसांपासून जसप्रीत बुमराह कसोटी क्रिकेटमध्ये पहिल्या स्थानावर विराजमान आहे. या वर्षाच्या सुरुवातीला देखील त्याचं हे स्थान अबाधित आहे. पण त्याने पहिलं स्थान काबिज करताना एका विक्रमाची नोंद केली आहे. यापूर्वी अशी कामगिरी करणं कोणत्याही भारतीय गोलंदाजाला शक्य झालं नाही. मेलबर्न कसोटीत 9 विकेट घेत त्याने या विक्रमाला गवसणी घातली आहे. आयसीसीने नुकतंच कसोटी क्रमवारी जाहीर केली आहे. यात जसप्रीत बुमराह 907 गुणांसह अव्वल स्थानी आहे. आयसीसी क्रमवारीत सर्वाच्च रँकिंगसह भारतीय गोलंदाज ठरला आहे. यापूर्वी भारताच्या कोणत्याही गोलंदाजाने हा आकडा गाठला नाही.

आर अश्विनने 2016 मध्ये 904 गुणांना स्पर्श करत पहिलं स्थान काबिज केलं होतं. मागच्या आठवड्यात जसप्रीत बुमराह या गुणांसह आर अश्विनच्या पंगतीत बसला होता. मात्र मेलबर्न कसोटीत 9 विकेट घेत त्याच्या गुणांमध्ये वाढ झाली आहे. तसेच 907 गुणांसह अव्वल स्थान गाठणारा पहिला फलंदाज ठरला आहे. जसप्रीत बुमराहसाठी 2024 वर्ष संस्मरणीय राहिलं आहे. त्याने 21 आंतरराष्ट्रीय सामन्यात 13.76 च्या सरासरीने 86 विकेट घेतल्या आहेत. यात 5 वेळा 5 विकेट घेण्याचा मान मिळवला आहे. तर 13 कसोटी सामन्यात 71 विकेट घेतल्या आहेत. बॉर्डर गावस्कर कसोटी मालिकेच्या 4 सामन्यात 30 विकेट घेतल्या आहेत. त्याच्या आसपास दुसरा गोलंदाज नाही.

दरम्यान, आयसीसी जारी केलेल्या क्रमवारीत बुमराहाच्या आसपास देखील कोणी नाही. ऑस्ट्रेलियाचा जोश हेझलवूड 843 गुणांसह दुसऱ्या, तर पॅट कमिन्स 837 गुणांसह तिसऱ्या स्थानावर आहे. दक्षिण अफ्रिकेचा कगिसो रबाडा 832 चौथ्या, तर मार्को यानसेन 803 गुणांसर पाचव्या स्थानी आहे. दुसरीकडे, इंग्लंडचा सिडनी बार्न्स हा कसोटी क्रिकेटमध्ये सर्वाधिक गुण मिळवणारा खेळाडू ठरला आहे. 1914 मध्ये त्यांनी 932 रेटिंग गुण मिळवले होते.