मुंबई : एनबीएफसी क्षेत्रातील दिग्गज मुथूट फायनान्स नवीन शाखा उघडण्याची तयारी करत आहे. मुथूट फायनान्सने आज बुधवार, २६ फेब्रुवारी रोजी शेअर बाजारांना माहिती दिली की त्यांना रिझर्व्ह बँकेकडून ११५ नवीन शाखा उघडण्याची परवानगी मिळाली आहे. कंपनीने नवीन शाखांची माहिती आरबीआयला दिली आहे. कंपनीने म्हटले आहे की, आरबीआयने मुथूट फायनान्सला सोन्याच्या दागिन्यांच्या सुरक्षिततेसाठी आणि साठवणुकीसाठी योग्य व्यवस्था सुनिश्चित करण्याचा सल्ला दिला आहे, ज्यामध्ये सेफ डिपॉझिट व्हॉल्टचा समावेश आहे.यापूर्वी मुथूट फायनान्सने जाहीर केलेल्या निकालांनुसार, डिसेंबर तिमाहीत कंपनीचा निव्वळ नफा ३२.७ टक्के वाढून १,३६३ कोटी रुपये झाला. तर गेल्या वर्षी याच तिमाहीत कंपनीचा नफा १,०२७.३ कोटी रुपये होता. कंपनीचे निव्वळ व्याज उत्पन्न ४२.८ टक्के वाढून २,७२१.४ कोटी रुपये झाले. मागील आर्थिक वर्षाच्या याच तिमाहीत ते १,९०५.७ कोटी रुपये होते. प्रामुख्याने सोन्याच्या कर्जावर लक्ष केंद्रित करणाऱ्या एनबीएफसी कंपन्यांनीही अपेक्षेपेक्षा चांगली कामगिरी केली. कंपनीचे निकाल विश्लेषकांच्या अंदाजांपेक्षा जास्त होते.मंगळवार, २५ फेब्रुवारी रोजी, मुथूट फायनान्सचे शेअर्स ०.५ टक्के घसरून २,१७७.५५ रुपयांवर बंद झाले. गेल्या सहा महिन्यांत या शेअरमध्ये १२.४६ टक्के वाढ झाली आहे. या शेअर्सचा ५२ आठवड्यांचा उच्चांक २३३४.८० रुपये आणि ५२ आठवड्यांचा नीचांक १,२६१.९० रुपये आहे.
