नागपूर: नागपुरातील कुख्यात गुन्हेगारांसोबत रिल्स तयार करून सोशल मीडियावर पोस्ट केल्याने सायबर पोलिसांनी गुन्हा दाखल केला आहे. पुण्यातील गजा मारणे याच्या सोबत असलेल्या या व्हिडीओमुळे नागपुरातील गुन्हेगारी जगतावर नवीन चर्चा सुरू झाली आहे.

पुण्यातील कुख्यात गुन्हेगार गजा मारणे याने भेटीदरम्यान स्थानिक गुन्हेगारांसोबत वेळ घालवला. विशेष म्हणजे, नागपुरातील कुख्यात गुन्हेगार राजा गौस याने गजा मारणे सोबतचा एक इंस्टाग्राम रिल्स व्हिडीओ शेअर केला. या व्हिडीओमध्ये, "मै हु नागपूर का किंग" अशा प्रकारचा उल्लेख करण्यात आला होता, जो पोलिसांसाठी थेट आव्हान मानला जात आहे.

या व्हिडीओमधून स्थानिक गुन्हेगारांची ताकद दाखवण्याचा प्रयत्न करण्यात आला होता. पोलिसांनी या घटनेची गंभीर दखल घेत सायबर गुन्हे शाखेच्या माध्यमातून तपास सुरू केला.

सायबर पोलिसांनी संबंधित व्हिडीओची पडताळणी करत, अशा प्रकारे समाजात दहशत पसरवणाऱ्या कृत्यावर कारवाई करण्याचा निर्णय घेतला. प्राथमिक तपासात राजा गौससह आणखी दोन ते तीन जणांनी ही रिल्स तयार करून सोशल मीडियावर अपलोड केली होती.

राजा गौसला ताब्यात घेण्यात आले असून, त्याचा मोबाईल जप्त करण्यात आला आहे. याशिवाय, गजा मारणेचा या प्रकरणाशी संबंध कितपत आहे, हे तपासण्यासाठी पोलिसांकडून अधिक चौकशी केली जात आहे.

या घटनेनंतर, गुन्हेगारांनी घाबरून संबंधित व्हिडीओ सोशल मीडियावरून डिलीट केले. मात्र, सायबर पोलिसांनी इंस्टाग्रामकडे या डिलीट झालेल्या व्हिडीओंबाबत माहिती मागवली आहे. पुढील तपासात या व्हिडीओच्या आधारे आणखी काही गुन्हेगारांवर कारवाई होण्याची शक्यता आहे.

गजा मारणेने नागपूरमध्ये स्थानिक गुन्हेगारांसोबत वेळ घालवल्याची माहिती पोलिसांना मिळाली आहे. तो नागपुरातून पुढील प्रवासासाठी निघण्याआधी, स्थानिक गुन्हेगारांसोबत भोजन करताना दिसला होता. त्यामुळे, या प्रकरणात गजा मारणेलाही चौकशीसाठी बोलावले जाईल का, याकडे सर्वांचे लक्ष लागले आहे.

नागपूर पोलिसांनी स्थानिक गुन्हेगारी टोळ्यांवर अधिक लक्ष केंद्रीत केले असून, सोशल मीडियाचा गैरवापर करून दहशत निर्माण करणाऱ्या गुन्हेगारांविरुद्ध कठोर पावले उचलण्याचे संकेत दिले आहेत. सायबर पोलिसांकडून या प्रकरणात आणखी काही संशयितांची चौकशी होण्याची शक्यता आहे.