चॅम्पियन्स ट्रॉफी २०२५ स्पर्धेतील पहिला उपांत्य सामना मंगळवारी (४ मार्च) भारत आणि ऑस्ट्रेलिया संघात खेळवला जात आहे. दुबईला होत असलेल्या या सामन्यात ऑस्ट्रेलियाने २५० धावांचा टप्पा ओलांडण्यात यश मिळवलं आहे. ऑस्ट्रेलियाने भारतासमोर विजयासाठी २६५ धावांचे लक्ष्य ठेवले आहे.

दोन्ही संघांनी आत्तापर्यंत दोनदा चॅम्पियन्स ट्रॉफी जिंकली आहे, त्यामुळे आता ते हा सामना जिंकून तिसऱ्या विजेतेपदाकडे महत्त्वाचे पाऊल टाकण्यात उत्सुक असतील. तसेच भारताने गेल्या दोन चॅम्पियन्स ट्रॉफीमध्ये अंतिम सामना खेळला आहे. त्यामुळे आता भारतीय संघ सलग तिसऱ्यांदा फायनलमध्ये जाण्यासाठी प्रयत्न करताना दिसेल.

या सामन्यात संघ सर्वबाद झाला असला, तरी मोठी धावसंख्या उभारण्यासाठी फलंदाजांनी शेवटपर्यंत चांगली झुंज दिली. त्यांच्याकडून कर्णधार स्टीव्ह स्मिथ आणि यष्टीरक्षक फलंदाज ऍलेक्स कॅरेने अर्धशतके साकारली.

लक्षात घेण्यासारखी गोष्ट अशी की ऑस्ट्रेलियाविरुद्ध हा सामना जिंकायचा असेल, तर इतिहास रचावा लागणार आहे. कारण यापूर्वी ऑस्ट्रेलियाविरुद्ध आयसीसी वनडे स्पर्धेत सर्वोच्च धावांचा पाठलाग २६१ इतकाच झाला आहे. हा पाठलागही २०११ वनडे वर्ल्ड कपच्या उपांत्यपूर्व सामन्यात भारताने केला होता. पण आता भारताला हा विक्रम मोडावा लागेल, तरच भारतीय संघ चॅम्पियन्स ट्रॉफी २०२५ स्पर्धेच्या अंतिम सामन्यात पोहोचणार आहे.

या सामन्यात ऑस्ट्रेलियाने नाणेफेक जिंकून प्रथम फलंदाजी करण्याचा निर्णय घेतला होता. ऑस्ट्रेलियाकडून ट्रॅव्हिस हेड आणि कुपर कोनोली यांनी सलामीला फलंदाजी करताना डावाची सुरूवात केली. पण कुपर कोनोलीला शून्यावरच मोहम्मद शमीने माघारी धाडले.