वूमन्स प्रीमियर लीग २०२५ स्पर्धेचा अखेरचा साखळी सामना मुंबई इंडियन्स विरुद्ध रॉयल चॅलेंजर्स बंगळुरू संघात मंगळवारी पार पडला. या सामन्यात बंगळुरूने ११ धावांनी विजय मिळवला. त्यामुळे वूमन्स प्रीमियर लीग २०२५ स्पर्धेचे पाँइंट्स टेबलवरील पाचही संघांचे स्थान निश्चित झाले असून प्लेऑफच्या लढतींचे चित्रही स्पष्ट झाले.

बंगळुरूविरुद्ध विजय मिळवून मुंबईला अव्वल क्रमांकावर थेट अंतिम सामना गाठण्याची संधी होती, पण त्यांना पराभवाचा सामना करावा लागला. वूमन्स प्रीमियर लीगमध्ये पाच संघांमध्ये साखळी फेरीनंतर जो संघ अव्वल स्थान पाँइंट्स टेबलमध्ये मिळवतो, तो संघ थेट अंतिम सामन्यात प्रवेश करतो. या नियमानुसार दिल्ली कॅपिटल्स थेट अंतिम सामन्यासाठी पात्र ठरले आहे.

८ सामन्यांपैकी ५ सामने जिंकले आहेत. मुंबई इंडियन्सनेही ८ सामन्यांपैकी ५ सामने जिंकले आहेत. त्यामुळे दोन्ही संघांचे १० गुण आहेत. परंतु दिल्लीचा नेट रनरेट (+०.३९६) मुंबईपेक्षा (+०.१९२) चांगला आहे. त्यामुळे दिल्ली अव्वल क्रमांकावर राहिले.

दिल्लीने तिन्ही हंगामात अंतिम सामन्यात स्थान मिळवण्याचा कारनामा केला आहे. पहिल्या दोन्ही हंगामात त्यांना उपविजेतेपदावर समाधान मानावे लागले होते. आता पहिले विजेतेपद मिळवण्याचा त्यांचा प्रयत्न असेल.