दरम्यान, त्याच्या नेतृत्वात गेल्यावर्षी चेन्नईला ५ व्या क्रमांकावर समाधान मानावे लागले. त्यांची प्लेऑफची संधी अगदी थोडक्यात हुकली. तथापि, अनेकांनी असंही म्हटलं की ऋतुराज हा फक्त पेपरवर कर्णधार आहे, निर्णय धोनीच घेतो. आता या सर्वच गोष्टींबाबत धोनीनेच मौन सोडले आहे. त्याने जिओस्टारशी बोलताना याबाबत भाष्य केले आहे.

धोनी म्हणाला, 'ऋतुराज आता बरीचवर्षे झाले संघाचा भाग आहे. त्याचा स्वभाव चांगला आहे, तो खूप शांत आहे, संयमी आहे. त्यामुळे ही अशी काही कारणे आहेत, ज्यामुळे आम्ही त्याचा नेतृत्वासाठी विचार केला होता. '

त्याचबरोबर मैदानातील महत्त्वाचे निर्णय ऋतुराजच घेत असल्याचेही धोनीने सांगितले. तो म्हणाला, 'त्याला स्पर्धा सुरू होण्यापूर्वीच मी सांगितलं होतं की मी जर तुला कोणता सल्ला दिला, तर याचा अर्थ असा नाही की तू तो ऐकलाच पाहिजे. मी जितके शक्य असेल, तितके लांब राहणार आहे.'

४३ वर्षीय धोनी पुढे म्हणाला, 'गेल्या हंगामादरम्यानही खूप लोकांना असं वाटलं की मी मागून सर्व निर्णय घेत आहे. पण खरं हे आहे की ९९ टक्के निर्णय ऋतुराजने घेतले होते. गोलंदाजीतील बदल, क्षेत्ररक्षण असे महत्त्वाचे निर्णय सर्व त्याचे होते. मी त्याला फक्त मदत करत होतो. त्याने खेळाडूंना खूप चांगल्या प्रकारे हाताळलं.'

दरम्यान, चेन्नई सुपर किंग्सने आयपीएल २०२५ ची सुरुवात ऋतुराजच्या नेतृत्वात मुंबई इंडियन्सविरुद्धच्या विजयाने केली आहे. या सामन्यात ऋतुराजने आक्रमक अर्धशतकी खेळीही केली.