इंडियन प्रीमियर लीग २०२५ स्पर्धेत सनरायझर्स हैदराबाद विरुद्ध गुजरात टायटन्स संघात रविवारी (६ एप्रिल) सामना सुरू आहे. या सामन्यात गुजरातने सामन्यात वर्चस्व ठेवलं आहे. पण तरी त्यांना एक मोठा धक्का या सामन्यात बसला. त्यांचा एक महत्त्वाचा खेळाडू दुखापतग्रस्त झाला असून त्याला मैदानातूनच बाहेर जावं लागलं आहे.

या सामन्यात प्रथम गोलंदाजी करणाऱ्या गुजरातला मोहम्मद सिराजने दमदार सुरुवात करून दिली होती. त्याने ट्रॅव्हिस हेड आणि अभिषेक शर्मा या सनरायझर्स हैदराबादच्या सलामीवीरांच्या विकेट्स घेतल्या होत्या.

पण या सामन्यात पॉवरप्ले सुरू असताना सध्याचा सर्वोत्तम क्षेत्ररक्षक असलेल्या ग्लेन फिलिप्स सब्स्टिट्युट म्हणून क्षेत्ररक्षण करायला आला होता.

६ व्या षटकादरम्याने प्रसिद्ध कृष्णाच्या गोलंदाजीवर इशान किशनने शॉट खेळला. पण तो शॉट फिलिप्सने सूर मारत आडवला. पण यादरम्यान त्याच्या मांडीजवळ वेदना झाल्या, ज्यामुळे तो थेट खाली झोपला. त्यामुळे फिजिओ लगेचच मैदानात आले. त्यांनी त्याला तपासल्यानंतर लक्षात आले की त्याच्या वेदना अधिक आहेत. त्याला चालताही येत नव्हते, त्यामुळे त्याला आधार देत मैदानातून बाहेर नेण्यात आले.