इंडियन प्रीमियर लीग २०२५ मध्ये अनेक युवा खेळाडूंनी आपली छाप पाडली आहे. यामध्ये लखनौ सुपर जायंट्सकडून खेळणाऱ्या २५ वर्षीय मिस्ट्री स्पिनर दिग्वेश राठीचाही समावेश आहे. तो त्याच्या गोलंदाजीसोबतच त्याच्या सेलिब्रेशनसाठीही चर्चेत आहे.

त्याने नुकतीच ४ एप्रिलला मुंबई इंडियन्सविरुद्ध लखनौ सुपर जायंट्सला १२ धावांनी विजय मिळवून देण्यात मोलाचा वाटा उचलला होता. त्याने या सामन्यात २१ धावाच देत एक विकेट घेतली होती. त्यामुळे त्याला सामनावीर पुरस्कारही मिळाला होता.

त्याने आत्तापर्यंत आयपीएल २०२५ मध्ये ४ सामन्यांत ६ विकेट्स घेतल्या आहेत. दरम्यान, मुंबई इंडियन्सविरुद्धच्या सामन्यानंतर दिग्वेशने सांगितले होते की तो वेस्ट इंडिजचा दिग्गज सुनील नरेनला आदर्श मानतो. त्याला पाहूनच त्याला गोलंदाजीची प्रेरणा मिळाली.

तसेच तो त्याच्याप्रमाणे गोलंदाजी करण्याचाही प्रयत्न करतो. आता त्याचे त्याचा आदर्श असलेल्या सुनील नरेनशी भेटही झाली आहे.

लखनौला ८ एप्रिलला कोलकातामध्ये सामना खेळायचा आहे. यासाठी लखनौ संघ कोलकाताला पोहचला असून सरावालाही सुरुवात केली आहे. यावेळीचा एक व्हिडिओ कोलकाता नाईट रायडर्सने शेअर केला आहे.

ज्यात दिसते की लखनौ सुपर जायंट्सचा कर्णधार कोलकाता नाईट रायडर्सचा सलामीवीर सुनील नरेनला घेऊन येतो आणि त्याची दिग्वेश राठीशी भेट घडवून आणतो.