मुंबई : देशातील सामान्य जनतेला महागाईच्या आघाडीवर मोठा दिलासा मिळाला आहे. अन्नपदार्थांच्या किमतीत झालेल्या घसरणीमुळे घाऊक किंमत आधारित महागाई फेब्रुवारीतील २.३८% वरून मार्चमध्ये २.०५% पर्यंत कमी झाली. मंगळवारी जाहीर झालेल्या सरकारी आकडेवारीत ही माहिती देण्यात आली. मार्चमध्ये घाऊक महागाई सहा महिन्यांच्या नीचांकी पातळीवर आली आहे. मात्र, घाऊक किंमत निर्देशांक (WPI) आधारित महागाई वार्षिक आधारावर वाढली आहे. मार्च २०२४ मध्ये हा आकडा ०.२६ टक्के होता.उद्योग मंत्रालयाने जारी केलेल्या निवेदनानुसार, अन्न उत्पादने, इतर उत्पादन, वीज आणि कापड उत्पादन इत्यादींच्या किमती वाढल्यामुळे मार्च २०२५ मध्ये महागाई वार्षिक आधारावर वाढली. घाऊक किंमत निर्देशांकाच्या आकडेवारीनुसार, अन्न महागाई फेब्रुवारीमध्ये ३.३८% वरून मार्चमध्ये १.५७% पर्यंत कमी झाली. याचे मुख्य कारण म्हणजे भाज्यांच्या किमतीत झालेली मोठी घसरण. मात्र, उत्पादित उत्पादनांमधील महागाई फेब्रुवारीमध्ये २.८६% होती. तर मार्चमध्ये ती ३.०७% वर पोहोचली. इंधन आणि वीज यांच्या किमतीतही वाढ झाली आणि मार्चमध्ये ती ०.२०% वर राहिली. मार्चमध्ये बटाट्यातील घाऊक महागाई दर -६.७७ टक्के राहिला आहे. तो फेब्रुवारीमध्ये २७.५४ टक्के होता. त्याच वेळी कांद्याचा घाऊक महागाई दर फेब्रुवारीतील ४८.०५ टक्क्यांवरून २६.६५ टक्क्यांवर आला आहे. मार्चमध्ये अंडी, मांस आणि माशांमधील घाऊक महागाई फेब्रुवारीतील १.४८ टक्क्यांवरून ०.७१ टक्क्यांवर आली. फेब्रुवारीमध्ये भाज्यांच्या घाऊक किमतीतील महागाई दर -५.८० टक्क्यांवरून मार्चमध्ये -१५.८८ टक्क्यांवर आला. मार्चमध्ये धान्यांचा घाऊक महागाई दर फेब्रुवारीतील ६.७७ टक्क्यांवरून ५.४९ टक्क्यांवर आला. या कालावधीत मुख्य चलनवाढीचा दर फेब्रुवारीमध्ये १.३० टक्के होता, जो १.५ टक्के होता.महागाईत घट आणि वाढीतील मंदीची शक्यता लक्षात घेऊन आरबीआयने एप्रिलच्या बैठकीत सलग दुसऱ्यांदा रेपो दरात ०.२५ टक्क्यांची कपात केली. यासह रेपो दर आता ६ टक्क्यांवर आला आहे. या वर्षाच्या सुरुवातीला तो ६.५ टक्के होता. रिझर्व्ह बँकेने आपल्या टिप्पणीत आर्थिक वर्ष २०२६ साठी भारताचा विकासदराचा अंदाज पूर्वीच्या ६.७ टक्क्यांवरून ६.५ टक्के केला आहे. यामुळे फेब्रुवारीमध्ये अंदाजित ४.२ टक्क्यांवरून महागाईचा अंदाज ४ टक्क्यांपर्यंत कमी करण्यात आला आहे.