अजिंक्यच्या विकेटनंतर चहलने आणखी धक्के दिले. रघुवंशी २८ चेंडूंत ५ चौकार व १ षटकारांसह ३७ धावांवर झेलबाद झाला. त्यानंतर ग्लेन मॅक्सवेलने वेंकटेश अय्यरची ( ७) विकेट मिळवून दिली. त्यानंतर चहलने रिंकू सिंग ( २) व रमणदीप सिंग ( ०) यांच्या विकेट्स घेताना सामन्याला कलाटणीच दिली. पहिल्या ६ षटकांत कोलकाताने ५५ धावांत २ विकेट्स गमावल्या होत्या आणि त्यानंतरच्या पुढील काही षटकांत त्यांनी २४ धावांवर ५ विकेट्स गमावल्या.

आंद्रे रसेल आणि हर्षित राणा यांच्याकडूनच आशा होत्या. पण, श्रेयसने गोलंदाजीसाठी मार्को यान्सेनला परत बोलावले आणि त्याने हर्षितचा ( ३) त्रिफळा उडवून ७९ धावांवर आठवा धक्का दिला. चहलच्या पहिल्या तीन षटकांत ३ विकेट्स आल्या होत्या आणि चौथ्या षटकात आंद्रे रसेलने त्याला झोडला. ४२ चेंडूंत ३३ धावा हव्या असताना चहलच्या त्या षटकात रसेलने १६ धावा चोपल्या. आता कोलकाताला ३६ चेंडूंत १७ धावा हव्या होत्या.

वैभव अरोराने १८ व्या षटकात अर्शदीप सिंगच्या भेदक माऱ्याचा सामना करून पाच चेंडूंवर चांगला बचाव केला. पण, अर्शदीपने शेवटचा चेंडू ओव्हर द विकेट येताना बाऊन्सर वैभवच्या शरीरावर फेकला अन् ग्लोव्ह्जला चेंडू घासून यष्टीरक्षकाकडे विसावला. चेन्नई सुपर किंग्सने २००९ मध्ये ११६ धावांचा यशस्वी बचाव केला होता आणि तो विक्रम मोडला गेला. मार्को यान्सनने १६व्या षटकात रसेलला ( १७) बाद करून पंजाबला ऐतिहासिक विजय मिळवून दिला. कोलकाताचा संपूर्ण संघ १५.१ षटकांत ९५ धावांवर तंबूत परतला अन् पंजाबने १६ धावांनी विजय मिळवला.