मुंबई : पुढील एका महिन्यात शेअर बाजारात मोठ्या हालचाली दिसून येऊ शकतात. अलिकडेच सूचीबद्ध झालेल्या २२ कंपन्यांच्या अँकर गुंतवणूकदारांचा लॉक-इन कालावधी पुढील एका महिन्यात संपत आहे. यामुळे शेअर बाजारात २.३६ लाख कोटी रुपयांपेक्षा जास्त किमतीचे शेअर्स व्यवहारासाठी उपलब्ध होतील. या कंपन्यांमध्ये ह्युंदाई मोटर इंडिया, डॉ. अग्रवाल हेल्थ केअर, स्विगी आणि वारी एनर्जीज आदी कंपन्या आहेत. अँकर लॉक-इन कालावधी काय आहे?जेव्हा एखादी कंपनी आयपीओ आणते तेव्हा काही मोठे संस्थात्मक गुंतवणूकदार म्हणजे अँकर इन्व्हेस्टर आयपीओमध्ये गुंतवणूक करतात. या गुंतवणूकदारांना आयपीओमध्ये भाग घेतल्यानंतर विशिष्ट कालावधीसाठी त्यांचे शेअर्स विकू नयेत अशी अट असते, याला लॉक-इन कालावधी म्हणतात. हा कालावधी सहसा ३ किंवा ६ महिने असतो. कालावधी पूर्ण झाल्यावर हे शेअर्स खुल्या बाजारात विकण्याची परवानगी दिली जाते. कोणत्या कंपन्यांचे लॉक-इन संपणारनुवामा अल्टरनेटिव्ह अँड क्वांटिटेटिव्ह रिसर्चच्या अहवालानुसार, ज्या कंपन्यांचे शेअर्स लॉक-इन पीरियड संपत आहे त्यात ह्युंदाई मोटर इंडिया, डॉ. अग्रवाल हेल्थ केअर, स्विगी, वारी एनर्जीज, डेंटा वॉटर अँड इन्फ्रा, अजॅक्स इंजिनिअरिंग, डिफ्यूजन इंजिनिअर्स, निवा बुपा हेल्थ इन्शुरन्स, गोदावरी बायोरिफायनरीज, हरिओम पाईप, दीपक बिल्डर्स अँड इंजिनिअर्स, ब्लू जेट हेल्थ, अफकॉन्स इन्फ्रास्ट्रक्चर, होनासा कंझ्युमर (मामाअर्थ), सेलो वर्ल्ड, रेनबो चिल्ड्रन्स मेडिकेअर, ईएसएएफ स्मॉल फायनान्स बँक, एएसके ऑटोमोटिव्ह, एसीएमई सोलर होल्डिंग्ज, सेगिलिटी इंडिया आणि स्टॅलियन इंडिया फ्लोरोकेमिकल्स यांचा समावेश आहे. ह्युंदाईचे ५०.७८ कोटी शेअर्स खुलेह्युंदाई मोटर इंडियाने ऑक्टोबर २०२४ मध्ये भारतातील सर्वात मोठा आयपीओ लाँच केला. आयपीओचे एकूण मूल्य २७,८७० कोटी रुपये होते. या कंपनीचे ५०.७८ कोटी शेअर्स आता लॉक-इनपासून मुक्त असतील. या शेअर्सचे अंदाजे मूल्य ८१,८२१.६५ कोटी रुपये आहे. त्याच वेळी, स्टॅलियन इंडिया फ्लोरोकेमिकल्स, डेंटा वॉटर अँड इन्फ्रा, डॉ. अग्रवाल हेल्थ केअर आणि अजॅक्स इंजिनिअरिंग सारख्या कंपन्यांमध्ये ३ महिन्यांचा लॉक-इन संपत आहे, ज्यांच्या शेअर्सची अंदाजे किंमत ६५९.६५ कोटी रुपये आहे. उर्वरित कंपन्यांमध्ये ६ महिने किंवा त्याहून अधिक कालावधीचा लॉक-इन कालावधी संपत आहे. बाजारावर काय परिणाम ?तज्ञांच्या मते, लॉक-इन कालावधीनंतर बाजारात अचानक मोठ्या प्रमाणात शेअर्सची उपलब्धता झाल्याने शेअर्सच्या किमतींवर दबाव येऊ शकतो. मात्र, सर्व शेअर्स विकले पाहिजेत असे नाही कारण त्यापैकी मोठा भाग प्रवर्तक आणि त्यांच्या गटांकडे असतो, जे सहसा दीर्घकालीन गुंतवणूक करतात.