उन्हाळ्याच्या हंगामात, पुदिन्याच्या ज्यूसपासून ते त्याच्या चटणीपर्यंत सर्व काही बनवले जाते. पुदिन्याचे नैसर्गिक मेन्थॉल उष्णतेमध्येही आपला मूड चांगला करते. जर तुमची त्वचा प्रखर उन्हामुळे आणि आर्द्रतेमुळे निस्तेज होऊ लागली तर तुम्ही पुदिन्याचा वापर अनेक प्रकारे करू शकता. पुदिना पुनरुज्जीवित करण्याचे काम करते आणि फ्री रॅडिकल्सपासून संरक्षण करण्यास देखील उपयुक्त आहे. पुदिना त्वचेला थंडावा देतो आणि उष्णतेमुळे होणारे पुरळ, खाज आणि सूज दूर करण्यास देखील मदत करतो. पुदिन्यामध्ये व्हिटामिन सी असते आणि त्यात मॅग्नेशियम, कॅल्शियम, लोह, पोटॅशियम, फायबर व व्हिटॅमिन बी कॉम्प्लेक्समधील इतर अनेक जीवनसत्त्वे आणि शक्तिशाली अँटिऑक्सिडंट्स देखील असतात. म्हणून, पुदिना खाण्यापासून ते त्वचेवर लावण्यापर्यंत अनेक प्रकारे वापरला जाऊ शकतो. जाणून घेऊयात पुदिन्याचे काही उपयोग.

पुदिन्याचे टोनर

उन्हाळ्यात त्वचेला ताजी चमक मिळावी यासाठी तुम्ही पुदिन्याचे टोनर बनवू शकता. यामुळे त्वचेचे छिद्र घट्ट होतातच पण त्वचेवरील अतिरिक्त तेलही कमी होते, ज्यामुळे मुरुमांच्या समस्येपासून मुक्तता मिळते. पुदिन्याची पाने नीट धुवून पाण्यात उकळावीत. पुदिन्याचा अर्क पाण्यात चांगला मिसळल्यावर ते गाळून घ्या आणि थंड झाल्यावर त्यात गुलाबपाणी घाला व ते स्प्रे बाटलीत भरून फ्रीजमध्ये ठेवा. आणि ते टोनरप्रमाणे चेहऱ्यावर लावा.

पुदिन्याचा फेस पॅक

चेहऱ्यावरील डाग कमी करण्यासोबतच, पुदिना त्वचेचा रंग उजळ करतो आणि त्वचा मऊदेखील बनवतो. सनबर्नची समस्या कमी करण्यासाठी देखील हे प्रभावी आहे. पुदिन्याची पाने बारीक करा आणि त्यात लिंबू, काकडीचा रस आणि चंदन पावडरचे काही थेंब घाला. ते 15 ते 20 मिनिटे चेहऱ्यावर राहू द्यात. यानंतर चेहरा स्वच्छ पाण्याने धुवा. आठवड्यातून दोनदा हा पॅक चेहऱ्यावर लावावा.

पुदिन्याचा चहा

तुम्ही तुमच्या आहारात पुदिन्याचा चहादेखील समाविष्ट करू शकता. यामुळे शरीर थंड होईल आणि शरीर डिटॉक्सदेखील होईल. पुदिना हा व्हिटॅमिन सीचा स्रोत आहे, म्हणून त्याचा चहा त्वचेतील कोलेजन वाढवण्यासाठी फायदेशीर आहे. ज्यामुळे त्वचेवरील बारीक रेषा, निस्तेज त्वचा आणि सुरकुत्या यांसारख्या वृद्धत्वाची लक्षणे कमी होतात. पुदिन्याची पाने, दोन काळी मिरी, हिरवी वेलची बारीक करून दीड कप पाण्यात घालून एक कप पाणी शिल्लक राहीपर्यंत चांगले उकळा. त्यात लिंबू घाला व ते प्या.

आहारात पुदिन्याचा समावेश

उन्हाळ्यात, तुम्ही तुमच्या आहारात पुदिन्याचा समावेश वेगवेगळ्या प्रकारे करू शकता, ज्यामुळे तुमच्या त्वचेसोबतच तुमच्या आरोग्यालाही फायदा होईल. फ्रेश दिसण्यासाठी तुम्ही तुमच्या सॅलडमध्ये पुदिन्याचा समावेश करू शकता. लिंबाचा रस किंवा कच्च्या कैरीसोबत पुदिन्याची चटणी बनवा आणि ती खा. याशिवाय, पुदिना वेगवेगळ्या पेयांमध्ये देखील घालता येतो. तुम्ही पुदिन्याचे रायते बनवू शकता.

हेही वाचा : Mental Health : बिघडत्या मानसिक स्थितीची लक्षणे

संपादित – तनवी गुडे