पंतप्रधान नरेंद्र मोदी यांनी जातीनिहाय जनगणना करण्याचे निर्णय जाहीर केला आहे. यावर बोलताना संजय राऊत म्हणाले की, हा विषय राहुल गांधी यांनी उचलून धरला होता. अखेर मोदींना राहुल गांधींसमोर गुडघे टेकायला लागले. सरकार मोदी की सिस्टीम राहुल गांधी की, असा टोला देखील राऊत यांनी लगावला.

मुंबईतील जिओ वर्ल्ड सेंटर येथे आज भारताच्या पहिल्या 'जागतिक ऑडिओ-व्हिज्युअल आणि मनोरंजन' (वेव्हज्) शिखर परिषदेचे उद्घाटन पंतप्रधान नरेंद्र मोदी यांच्या हस्ते होणार आहे. यासाठी पंतप्रधान मोदी यांचे मुंबईत आगमन झाले आहे.

रायगडच्या पालकमंत्रिपदाचा तिढा अजून सुटलेला नाही. तरी देखील महाराष्ट्र दिनी रायगड जिल्ह्यातील अलिबाग येथे झेंडावंदनाचा मान आदिती तटकरे यांना देण्यात आला. तटकरे यांनी जिल्हाधिकाऱ्यांच्या उपस्थितीमध्ये झेंडावंदन केले. तटकरे यांनी अलिबागमध्ये झेंडावंदन केले तर महाडमध्ये भरत गोगावले यांनी झेंडावंदन केले.

पंतप्रधान नरेंद्र मोदी यांनी मराठीत ट्विट करत महाराष्ट्र दिना निमित्त शुभेच्छा दिल्या आहेत. ते म्हणाले, भारताच्या विकासात कायमच महत्त्वाची भूमिका बजावत आलेल्या, महाराष्ट्राच्या जनतेला महाराष्ट्र दिनाच्या शुभेच्छा. जेव्हा आपण महाराष्ट्राबद्दल विचार करतो, तेव्हा समोर येतो तो या भूमीचा गौरवशाली इतिहास आणि इथल्या जनतेचे धैर्य. हे राज्य प्रगतीचा एक मजबूत आधारस्तंभ आहे आणि त्याच वेळी आपल्या मूळाशीही घट्ट जोडलेले आहे. राज्याच्या प्रगतीसाठी माझ्या खूप खूप शुभेच्छा.

मुख्यमंत्री देवेंद्र फडणवीस यांनी राज्यातील आर्थिकदृष्ट्या गरजू रुग्णांना वैद्यकीय उपचारासाठी तत्काळ मदत मिळावी या उद्देशाने सर्व जिल्हाधिकारी कार्यालयांमध्ये 'मुख्यमंत्री सहाय्यता कक्ष' सुरू करण्यात येणार असल्याची घोषणा केली. 1 मे रोजी महाराष्ट्र दिनाचे औचित्य साधून हे कक्ष पालकमंत्री, मंत्री किंवा राज्यमंत्री यांच्या हस्ते उद्घाटन करण्यात येणार आहे. या निर्णयामुळे आर्थिक परिस्थितीमुळे रुग्णावर उपाचार करू न शकणाऱ्या रुग्णांच्या कुटुंबीयांना जिल्हास्तरावरच मदत मिळणार आहे.