मुंबई : आयटी क्षेत्रातील दिग्गज कंपनी टाटा कन्सल्टन्सी सर्व्हिसेस (TCS) ने आपल्या भागधारकांना प्रति शेअर ३० रुपये लाभांश देण्याची घोषणा केली आहे. या लाभांशाची रेकॉर्ड तारीखही निश्चित केली आहे. टीसीएसने जानेवारी-मार्च तिमाहीच्या निकालांसोबत लाभांश जाहीर केला होता.टीसीएसने ११ एप्रिल रोजी एक्सचेंज फाइलिंगमध्ये म्हटले की, संचालक मंडळाच्या बैठकीत संचालकांनी १ रुपये दर्शनी मूल्याच्या प्रत्येक शेअरसाठी ३० रुपये अंतिम लाभांश देण्याची शिफारस केली आहे. कंपनीच्या ३० व्या वार्षिक सर्वसाधारण सभेच्या (एजीएम) समाप्तीनंतर पाचव्या दिवशी हा लाभांश दिला जाईल. टीसीएस लाभांश रेकॉर्ड तारीखटाटा समूहातील टीसीएसने बुधवारी ३० एप्रिल रोजी बाजार बंद झाल्यानंतर सांगितले की, २०२४-२५ आर्थिक वर्षासाठी अंतिम लाभांश मिळविण्यासाठी पात्र असलेल्या भागधारकांच्या पात्रतेला अंतिम रूप देण्याची रेकॉर्ड तारीख बुधवार, ४ जून २०२५ ही निश्चित करण्यात आली आहे.कंपनीने म्हटले आहे की संचालक मंडळाने शिफारस केलेला अंतिम लाभांश वार्षिक सर्वसाधारण सभेत (एजीएम) मंजूर झाला तर टीडीएस कपातीनंतरचा लाभांश मंगळवार, २४ जून २०२५ रोजी दिला जाईल. या घोषणेसह आर्थिक वर्ष २०२५ मध्ये टीसीएसने आतापर्यंत दिलेला लाभांश आर्थिक वर्ष २०२४ मध्ये ७३ रुपयांपेक्षा जास्त झाला आहे. आर्थिक वर्ष २०२३ मध्ये कंपनीने प्रति शेअर एकूण ११५ रुपये लाभांश दिला होता. चौथ्या तिमाहीचे निकालआर्थिक वर्ष २०२५ च्या चौथ्या तिमाहीत टाटा कन्सल्टन्सी सर्व्हिसेस चा निव्वळ नफा १.७ टक्क्यांनी घटून १२,२२४ कोटी रुपयांवर पोहोचला. २०२४ या आर्थिक वर्षाच्या चौथ्या तिमाहीत कंपनीला १२,४३४ कोटी रुपयांचा नफा झाला. आर्थिक वर्ष २५ च्या चौथ्या तिमाहीत टीसीएसचा महसूल ५.२ टक्क्यांनी वाढून ६४,४७९ कोटी रुपये झाला. तिसऱ्या तिमाहीच्या तुलनेत कंपनीचे उत्पन्न फक्त ०.७९ टक्क्यांनी वाढले आहे. आर्थिक वर्षातील नफासंपूर्ण आर्थिक वर्ष २०२५ मध्ये टीसीएसचा निव्वळ नफा ५.८ टक्क्यांनी वाढून ४८,५५३ कोटी रुपये झाला, तर कंपनीचे उत्पन्न ६ टक्क्यांनी वाढून २,५५,३४२ कोटी रुपये झाले. टीसीएसने ३० अब्ज डॉलर्सचा महसूल ओलांडला.