डिजिटल इंडियाला प्रोत्साहन देण्यासाठी ऑनलाइन व्यवहारांवर भर दिला जात आहे. मात्र असे असताना या डिजिटल पेमेंटचा फटका बसत असल्यानं नागपूर जिल्ह्यातल्या पेट्रोल पंप चालकांनी डिजिटल पेमेंट न स्वीकारण्याचा निर्णय घेतलाय. १० मे पासून जिल्ह्यातील कोणत्याच पेट्रोल पंपावर डिजिटल पेमेंट स्वीकारले जाणार नाही. विदर्भ पेट्रोल असोसिएशनने असा निर्णय़ घेतला असून यामुळे ग्राहकांना मोठा फटका बसण्याची शक्यता आहे.
सायबर फसवणुकीच्या वाढत्या घटनांमुळे पेट्रोलपंप धकरकांचा बँक खात्यातील रक्कम गोठवली जात असल्याने विदर्भ पेट्रोलियम डीलर्स असोसिएशनने हा निर्णय घेतला. सद्यस्थितीत देशभरात डिझिटल व्यवहार मोठ्या प्रमाणात वाढले आहेत. मात्र, याचाच गैरफायदा सायबर गुन्हेगार घेत आहे. काही बनावट व्यवहारांमुळे पंप चालकांच्या खात्यांतील लाखो रुपयांची रक्कम बँकांनी गोठवली आहे. तर काही प्रकरणांमध्ये संपूर्ण बँक खातीच गोठवण्यात आली आहेत.
गोठवलेल्या खात्यांतील रक्कम गृहमंत्रालयाच्या आदेशाशिवाय परत मिळवता येत नाही. ही प्रक्रिया अत्यंत गुंतागुंतीची असून, सायबर क्राइम विभागाकडे तक्रार देऊनही अद्याप कोणतेही समाधानकारक उत्तर मिळालेले नाही. या समस्येचे लवकरात लवकर समाधान झाले नाही, तर संपूर्ण महाराष्ट्रात डिजिटल पेमेंट बंद करण्याचा विचार संघटना करत आहे.
विदर्भ पेट्रोल पंप असोसिएशनने डिजिटल पेमेंट बंदीचा निर्णय घेतला आहे. मात्र त्यांचा ग्राहकांवर परिणाम होणार हे निश्चित आहे. डिजिटल इंडियासाठी आग्रही असलेल्या सरकारकडून या निर्णयासंबंधी कोणती भूमिका घेतली जाते हे देखील पाहणे महत्त्वाचे असणार आहे. विदर्भ पेट्रोलियम डीलर्स असोसिएशनचे अध्यक्ष गौरव जैस्वाल यांच्या नेतृत्वात हे निर्णय घेण्यात आले आहेत.
