इंडियन प्रीमियर लीग २०२५ स्पर्धेत शुक्रवारी (२३ मे) रॉयल चॅलेंजर्स बंगळुरू विरुद्ध सनरायझर्स हैदराबाद संघात होत आहे. लखनौमधील भारतरत्न श्री अटल बिहारी वाजपेयी एकाना क्रिकेट स्टेडियममध्ये होत असलेल्या या सामन्यात बंगळुरू पहिल्या क्रमांकावर येण्यासाठी, तर हैदराबाद प्रतिष्ठेसाठी खेळत आहे.

या सामन्यात इशान किशनने शानदार खेळ केला, पण त्याचे शतक थोडक्यात हुकले. पण त्याच्या खेळीच्या मदतीने हैदराबादने बंगळुरूसमोर २३२ धावांचे मोठे लक्ष्य ठेवले आहे.

या सामन्यात दुखापतग्रस्त रजत पाटिदारच्या जागेवर प्रभारी कर्णधारपद सांभाळणाऱ्या जितेश शर्माने नाणेफेक जिंकून प्रथम गोलंदाजी करण्याचा निर्णय घेतला. त्यामुळे सनरायझर्स हैदराबाद प्रथम फलंदाजीसाठी उतरले.

पुनरागमन करणाऱ्या ट्रॅव्हिस हेड आणि अभिषेक शर्मा यांनी सलामीला फलंदाजीला येत चांगली सुरुवात केली होती. त्यांनी आक्रमक खेळ केला होता. परंतु, चौथ्या षटकात अभिषेक शर्माला लुंगी एनगिडीने फिल सॉल्टच्या हातून झेलबाद केले. त्याने १७ चेंडूत ३४ धावा केल्या, त्यात ३ चौकार आणि ३ षटकारांचा समावेश आहे.

त्याच्यापाठोपाठ पुढच्याच षटकात ट्रॅव्हिस हेडला भूवनेश्वर कुमारने रोमारियो शेफर्डच्या हातून झेलबाद करत माघारी धाडले. हेडने १० चेंडूत १७ धावा केल्या.