मुंबई : इन्कम टॅक्स रिटर्न (ITR) भरण्यास सुरूवात झाली आहे. तुम्हाला २०२४-२५ या आर्थिक वर्षासाठी आयटीआर दाखल करायचा असेल परंतु आयकर पोर्टलचा पासवर्ड विसरला असेल तर घाबरून जाण्याची गरज नाही. तुम्ही पासवर्डशिवायही तुमचा ITR सहजपणे दाखल करू शकता. तुम्हाला फक्त तुमच्या नेट बँकिंगची आवश्यकता असेल.



पासवर्डशिवाय आयटीआर कसा दाखल करायचा?

तुम्हाला आयकर पोर्टलचा पासवर्ड आठवत नसेल, तर तो सुरुवातीलाच रीसेट करण्याची गरज नाही. देशातील बहुतेक बँका तुम्हाला नेट बँकिंगद्वारे आयकर पोर्टलवर लॉग इन करण्याची सुविधा देतात. ही पद्धत पूर्णपणे सुरक्षित आणि सोपी आहे. वेळेवर income tax return भरण्यास मदत होते. तुमच्या बँकेत ही सुविधा आहे की नाही हे जाणून घेण्यासाठी तुम्ही आयकर ई-फायलिंग वेबसाइटला भेट देऊ शकता आणि नेट बँकिंग पर्याय तपासू शकता किंवा तुम्ही थेट तुमच्या बँकेशी संपर्क साधू शकता.

आयसीआयसीआय बँकेत आयटीआर दाखल करणे

उदाहरणार्थ, आयसीआयसीआय बँकेचे ग्राहक त्यांच्या नेट बँकिंग खात्यातून सहजपणे आयटीआर दाखल करू शकतात.



- प्रथम तुमच्या ICICI नेट बँकिंग खात्यात लॉग इन करा.

- Payments and Transfers वर जा.

- नंतर Manage Your Taxes वर क्लिक करा.

- येथे तुम्हाला Income Tax e-Filing चा पर्याय मिळेल. त्यावर क्लिक केल्यावर तुम्ही थेट आयकर पोर्टलवर पोहोचाल.

- येथून तुम्ही पोर्टल पासवर्ड न टाकता आयटीआर दाखल करू शकता आणि फॉर्म २६एएस पाहणे, कर कॅल्क्युलेटर वापरणे, रिटर्न डाउनलोड करणे आणि ई-पे कर अशी अनेक कामे देखील करू शकता.



तुम्ही आयकर पोर्टलचा पासवर्ड हरवला असला तरी आयटीआर दाखल करण्यास उशीर करू नका. तुमच्या बँकेच्या नेट बँकिंग सुविधेचा वापर करा आणि कोणत्याही अडचणीशिवाय तुमचे रिटर्न वेळेवर दाखल करा. तुमची बँक ही सुविधा देते की नाही ते तपासा. ही पद्धत जलद, सुरक्षित आहे आणि तुमचा पासवर्ड रीसेट करण्याचा त्रास वाचवते. तुम्ही तुमचा पासवर्ड विसरला असाल आणि रिटर्न दाखल करण्यासाठी वेळ कमी असेल तर हे विशेषतः उपयुक्त आहे.