सावंतवाडी: शहरात पोलिसांनी ऑनलाईन चालणाऱ्या मटका जुगारावर कारवाई करत दोघा जणांना रंगेहाथ पकडले. पालकमंत्री नीतेश राणे यांनी कणकवलीतील मटका अड्ड्यावर टाकलेल्या धाडीनंतर आता सावंतवाडीतही ऑनलाईन मटका जुगाराचे रॅकेट उघड झाले आहे.
शहरातील सालईवाडा परिसरात सुदेश भास्कर विरनोडकर (वय ४६) हा व्यक्ती मोबाईलच्या ॲपचा वापर करून मटका घेत असल्याची माहिती पोलिसांना मिळाली होती. पोलिसांनी तत्काळ छापा टाकत त्याला ताब्यात घेतले.
चौकशी केली असता, तो हे आकडे आणि पैसे सालईवाडा येथीलच सचिन सुरेश बिद्रे या दुसऱ्या व्यक्तीकडे देत असल्याचे समोर आले. पोलिसांनी दोघांनाही ताब्यात घेतले असून, त्यांच्याकडून रुपये १० हजार किमतीचा मोबाईल फोन आणि जुगारासाठी वापरले जाणारे रुपये १ हजार ५० रोख रक्कम जप्त केली आहे.
