मुंबई : नाशिकस्थित एसएमई कंपनी निर्माण अ‍ॅग्री जेनेटिक्स लिमिटेडच्या शेअर्समध्ये आज १५ ऑक्टोबर रोजी मोठी घसरण झाली. कंपनीचे शेअर्स ५% ने घसरून लोअर सर्किटवर आले. सेबीने आयपीओ निधीचा गैरवापर केल्याच्या आरोपाखाली Nirman Agri Genetics Limited ला शेअर बाजारात व्यवहार करण्यास बंदी घातल्याच्या बातमीनंतर ही घसरण झाली. सेबीने कंपनीला पुढील आदेशापर्यंत सर्व प्रस्तावित कॉर्पोरेट कृती तात्काळ थांबवण्याचे निर्देश दिले आहेत. यामध्ये बोनस इश्यू, स्टॉक स्प्लिट आणि कंपनीचे नाव 'अ‍ॅग्रिकेअर लाईफ कॉर्प लिमिटेड' असे बदलण्याचे प्रस्ताव समाविष्ट आहेत.



मंगळवारी पारित केलेल्या अंतरिम आदेशात सेबीचे पूर्णवेळ सदस्य कमलेश चंद्र वार्ष्णेय यांनी Nirman Agri Genetics Limited चे प्रमोटर प्रणव कैलाश बागल यांना पुढील आदेशापर्यंत प्रत्यक्ष किंवा अप्रत्यक्षपणे निर्माण अ‍ॅग्री जेनेटिक्स लिमिटेडचे शेअर्स खरेदी, विक्री किंवा व्यवहार करण्यास मनाई केली. सेबीने केलेल्या तपासणीत असे आढळून आले की आयपीओद्वारे उभारलेल्या एकूण निधीपैकी ९३% म्हणजे १८.८९ कोटी रुपयांचा गैरवापर करण्यात आला.



हे निधी एकतर काल्पनिक, संशयास्पद संस्थांना किंवा बागल आणि त्यांच्या नातेवाईकांच्या नियंत्रणाखालील संस्थांना हस्तांतरित करण्यात आले. सेबीले असे आढळून आले की निर्माण अ‍ॅग्री जेनेटिक्स लिमिटेडने निधी वापराबद्दल परस्परविरोधी माहिती दिली आहे. सेबीने म्हटले की कंपनीने निधीच्या वापराबद्दल परस्परविरोधी माहिती दिली आहे आणि कोणत्याही खर्च किंवा व्यवहारांसाठी ठोस पुरावे किंवा पावत्या प्रदान केल्या नाहीत.



सेबीने त्यांच्या आदेशात म्हटले की, ज्या संस्थांना पेमेंट केले गेले त्यांच्याशी कोणतेही खरे करार किंवा वैध पावत्या असल्याचे सिद्ध करण्यात कंपनी अपयशी ठरली. आश्चर्याची गोष्ट म्हणजे तीन संस्थांना केलेले पेमेंट पूर्णपणे भिन्न पक्षांच्या बँक खात्यांमध्ये केले गेले.



कंपनीने चार विक्रेता संस्थांना १२.१४ कोटी रुपये दिल्याचा दावा केला होता. परंतु तपासात असे आढळून आले की या संस्थांची विश्वासार्हता शंकास्पद आहे. पेमेंट योग्य उद्देशाने केले गेले हे सिद्ध करण्यासाठी कंपनीने कोणतेही वैध करार किंवा बिले प्रदान केली नाहीत. ज्या बँक खात्यांमध्ये निधी हस्तांतरित केला गेला ते देखील पूर्णपणे असंबंधित पक्षांचे होते. एनएसईने केलेल्या साईट व्हिजिटमध्ये असे आढळून आले की ज्या पत्त्यांवर या संस्था सूचीबद्ध होत्या त्या पत्त्यांवर कोणतीही कंपनी किंवा कोणताही कृषी उपक्रम राबविला जात नव्हता.



निर्माण अ‍ॅग्री जेनेटिक्स लिमिटेड आयपीओमध्ये शेअर्सची किंमत 99 रुपये होती. कंपनीचा आयपीओ 15 मार्च 2023 ते 20 मार्च 2023 पर्यंत खुला राहिला. कंपनीचे शेअर्स 28 मार्च 2023 रोजी 102 रुपयांवर सूचीबद्ध झाले. शेअर्सचा 52 आठवड्यांचा उच्चांक 456 रुपये तर 52 आठवड्यांचा नीचांक 130.10 रुपये आहे.