खंडाळा : सातारा- पुणे महामार्गावर खंबाटकी घाटाच्या पायथ्याला जुन्या टोल नाक्याजवळ ब्रेक निकामी झालेल्या ट्रक एसटी बससह ट्रक अशा दोन वाहनांना धडक देत उलटला. या अपघातात तिन्ही वाहनांचे मोठे नुकसान झाले असून, चौघे जण जखमी झाले आहेत. सुदैवाने एसटी बसमधील २२ प्रवासी बचावले. घटनेची नोंद खंडाळा पोलिस ठाण्यात झाली आहे.

प्रकाशचंद्र बद्रीलाल मीना (वय ३५, रा. उदयपूर, राजस्थान), विनोद रतन जाट (वय २२, विजयनगर, जि. बियावर, राजस्थान), लकीसिंग केसरसिंग रावत (रा. पंचकोट, जि. अजमेर, राजस्थान) व प्रकाश आनंदराव वाडकर (वय २९, रा. बावधन, ता. वाई) अशी अपघातात जखमी झालेल्यांची नावे आहेत.

याबाबत पोलिसांनी दिलेली माहिती अशी, काल रात्री साडेदहा वाजण्याचा सुमारास खंबाटकी घाट उतरल्यानंतर भरधाव येणाऱ्या ट्रकचा ब्रेक निकामी झाला. यावेळी या ट्रकने आटपाडी- मुंबई एसटी बसला पाठीमागून जोराची धडक दिली. त्यामुळे बस झाडाला व कठड्याला धडकली. सुदैवाने बस उलटली नसल्याने सर्व प्रवासी बचावले, तर पुढे जाणाऱ्या ट्रकला पाठीमागून ट्रकने जोराची धडक दिली. यात दोन्ही ट्रक उलटले.

दरम्यान, चालक ट्रकमध्येच अडकले. त्यांना कटर व क्रेनच्या साह्याने खंडाळा रेस्क्यू टीम व खंडाळा पोलिसांनी मोठ्या शिताफीने बाहेर काढले. घटनेची फिर्याद चालक विकास दत्तात्रय गिरी (वय २५, रा. रामनगर, ता. आटपाडी, जि. सांगली) यांनी दिली.