गोरेगावमध्ये पार्क व्हॅनमध्ये पोलिसांना नवजात बाळ सापडले

निर्भया पथकाच्या मदतीने बाळावर तातडीने उपचार करण्यात आले

डॉक्टरांनी बाळ सुरक्षित असल्याचे सांगितले आहे

पोलिसांकडून बाळाच्या पालकांचा शोध सुरू आहे

मुंबईतून हृदय पिळवटून टाकणारी बातमी समोर आली आहे. गोरेगावमध्ये पार्क केलेल्या व्हॅनमध्ये पोलिसांना नवजात बाळ आढळले आहे. या घटनेनंतर पोलिसांच्या पायाखालची जमीन हादरली. पोलीस या बाळाच्या आईवडिलांचा शोध घेत असून या घटनेची माहिती मुंबई पोलिसांच्या अधिकृत एक्स हँडलने शेअर केली आहे. या घटनेने परिसरात संतापाची लाट उसळली आहे.

मिळालेल्या माहितीनुसार, काल मध्यरात्रीच्या सुमारास बीट मार्शल परिसरात गस्त घालत होते. यादरम्यान त्यांना रस्त्याच्या एका मंद प्रकाशाच्या भागातून जोरजोरात रडण्याचे आवाज ऐकू आले. पोलिसांनी आवाजाच्या दिशेने वाटचाल केली असता त्यांच्या लक्षात आले की हा आवाज तिथे पार्क केलेल्या गाडीतून येत आहे.

घटनास्थळी अधिक तपास केला असता त्यांना कापडात गुंडाळलेले बाळ उघड्यावर सोडलेले आढळले. या घटनेनंतर पोलिसांनी आजूबाजूला शोधाशोध केली असता रात्रीच्या काळोखात तिथे कोणीच सापडले नाही. तातडीने कारवाई करत, अधिकाऱ्यांनी निर्भया पथकाच्या मदतीने नवजात बाळाला वैद्यकीय सेवेसाठी शताब्दी रुग्णालयात दाखल केले.