भारतीय संघाचा स्टार फलंदाज दुखापतीने त्रस्त आहे. कधी संघात तर कधी संघाच्या बाहेर अशी त्याची स्थिती आहे. नुकताच दुखापतीतून सावरून टीम इंडियात कमबॅक केलं होतं. मात्र ऑस्ट्रेलियाविरुद्धच्या तिसऱ्या वनडे सामन्यात झेल पकडताना गंभीर दुखापत झाली आणि पुन्हा एकदा दुखापतग्रस्त झाला आहे. ऑस्ट्रेलियाचा विकेटकीपर एलेक्स कॅरीचा झेल पकडताना अय्यर पडला होता. यावेळी त्याच्या बरगड्यांच्या खाली गंभीर दुखापत झाली. तपासणीत त्याच्या स्प्लिनमधून हलका रक्तस्राव होत असल्याचं निष्पन्नझालं. त्यानंतर त्याला आयसीयूत भरती करण्याची वेळ आली. आता त्याच्या सर्जरीबाबत अपडेट समोर आली आहे. श्रेयर अय्यरच्या स्प्लीनला झालेल्या जखमेवर यशस्वीरित्य शस्त्रक्रिया करण्यात आली आहे. आता तो पूर्णपणे बरा असून दुखापतीतून सावरत आहे.

क्रिकबजच्या रिपोर्टनुसार, श्रेयस अय्यर आता पूर्णपणे स्थित आहे. त्याला आयसीयुतून बाहेर आणलं आहे. एक छोटी शस्त्रक्रिया करण्याची वेळ आली आणि ती यशस्वीरित्या पार पडली. पण त्याला सिडनी रुग्णालायत कमीत कमी पाच दिवस किंवा त्यापेक्षा अधिक काळ राहावं लागणार आहे. त्याला एक आठवडा आरामाचा सल्ला देण्यात आला आहे. त्यामुळे अजून पाच सहा दिवस तरी श्रेयस अय्यर रुग्णालयात असणार आहे. त्याला सामान्य वार्डमध्ये शिफ्ट केलं आहे. आता त्याची प्रकृती सुधारत असून जिवाला कोणताही धोका नसल्याने क्रीडाप्रेमींचा जीव भांड्यात पडला आहे.

बीसीसीआयची वैद्यकीय टीम श्रेयस अय्यरच्या प्रकृतीवर लक्ष ठेवून आहे. सिडनीतील स्पेशालिस्ट डॉक्टरांच्या संपर्कात आहे. श्रेयस अय्यरला डिस्चार्ज मिळताच थेट भारतात परतणार आहे. मात्र त्याला मैदानात परतण्यासाठी आणखी सहा आठवड्यांचा कालावधी लागू शकतो. त्यामुळे दक्षिण अफ्रिकेविरुद्धच्या वनडे मालिकेला मुकणार आहे. ही मालिका पुढच्या महिन्यात 30 नोव्हेंबरला सुरु होणार आहे.

दुसरीकडे, श्रेयस अय्यरचे वडील संतोष अय्यर यांनी आता ऑस्ट्रेलियाला जाणार नसल्याचे स्पष्ट केले आहे. त्यांनी डॉक्टरांवर विश्वास व्यक्त केला आहे.अय्यरच्या कुटुंबाला त्याच्या प्रकृतीबद्दल सिडनीहून नियमित अपडेट मिळत आहेत. दुसरीकडे, कर्णधार सूर्यकुमार यादवने अय्यरबाबत सांगितलं की, ‘मी आता अय्यरशी बोललो आहे आणि तो आता बरा आहे. पुढील काही दिवस त्यांच्या देखरेखीखाली असेल. आम्ही त्याला त्याच्यासोबत घरी घेऊन जाऊ.’