मुंबई : महायुतीमधील घटकपक्षांना राज्यात पुन्हा सत्ता मिळवून देण्यासाठी गेमचेंजर भूमिका पार पाडणाऱ्या मुख्यमंत्री माझी लाडकी बहीण योजनेच्या जानेवारी 2026 च्या हप्त्याची प्रतीक्षा लाडक्या बहिणींना आहे. या योजनेच्या लाडक्या बहिणींना लवकरच जानेवारी महिन्याचे 1500 रुपये मिळण्याची शक्यता आहे. कारण, जानेवारी महिन्याच्या हप्त्याचं वितरण करण्यासाठी महिला व बाल विकास विभागानं निधीची जमवाजमव सुरु केली आहे. सामाजिक न्याय विभागानं मुख्यमंत्री माझी लाडकी बहीण योजनेच्या जानेवारीच्या हप्त्याचं वितरण करण्यासाठी 98. 45 कोटी रुपयांचा निधी वर्ग केला आहे.
मुख्यमंत्री माझी लाडकी बहीण योजनेच्या जानेवारी महिन्याच्या हप्त्याच्या वितरणासाठी सामाजिक न्याय विभागानं 98.45 कोटी रुपयांचा निधी महिला व बालविकास विभागाला वर्ग केला आहे. याबाबतचा शासन निर्णय 18 फेब्रुवारीला जारी करण्यात आला आहे. यापूर्वी देखील सामाजिक न्याय विभागानं लाडकी बहीण योजनेच्या हप्त्याचं वितरण करण्यासाठी निधी महिला व बालविकास विभागाला वर्ग केला आहे.
महिला व बाल विकास विभागाकडून जानेवारी महिन्याचा हप्ता कधी वितरित केला जाणार याकडे सर्व लाभार्थी महिलांचं लक्ष लागलं आहे. नोव्हेंबर महिन्याचा हप्ता डिसेंबर 2025 च्या शेवटच्या आणि जानेवारी 2026 च्या सुरुवातीच्या काही दिवसात देण्यात आला होता. यानंतर डिसेंबर महिन्याचा हप्ता 14 जानेवारीच्या दरम्यान लाडक्या बहिणींच्या खात्यात वर्ग करण्यात आला होता. आता सामाजिक न्याय विभागानं लाडकी बहीण योजनेच्या जानेवारी महिन्याच्या हप्त्याच्या वितरणासाठी 98.45 कोटी रुपयांचा निधी वर्ग केल्यानं लाडक्या बहिणींना येत्या काही दिवसात लाडकी बहीणच्या हप्त्याची रक्कम मिळू शकते.
मुख्यमंत्री माझी लाडकी बहीण योजनेअंतर्गत लाडक्या बहिणींना दरमहा 1500 रुपयांची रक्कम अदा केली जाते. तर, ज्या लाडक्या बहिणी पीएम किसान सन्मान निधी योजना आणि नमो शेतकरी महासन्मान निधीचा लाभ घेतात त्यांना दरमहा लाडकी बहीण योजनेतून 500 रुपयांची रक्कम दिली जाते.
दरम्यान, मुख्यमंत्री माझी लाडकी बहीण योजनेच्या लाभार्थी महिलांच्या संख्येत घट झाल्याचं समोर आलं आहे. जुलै 2024 मध्ये योजना सुरु झाली होती तेव्हा लाभार्थ्यांची संख्या 2 कोटी 46 लाख इतकी होती. त्यापैकी केवळ 1 कोटी 90 लाख महिलांकडून ई केवायसी करण्यात आली. म्हणजेच 55 लाखांपेक्षा अधिक महिलांकडून ई केवायसी करण्यात आली नाही. डिसेंबर महिन्याच्या हप्त्याची रक्कम 1 कोटी 60 लाख महिलांना देण्यात आली आहे. सध्या ई केवायसी दुरुस्तीसाठी 31 मार्च 2026 पर्यंत मुदतवाढ देण्यात आली आहे.
