मध्य पूर्व आशियामध्ये भीषण युद्ध सुरू आहे. अमेरिका आणि इस्रायल इराणवर सतत हल्ले करत आहेत. इराणकडूनही या हल्ल्यांना प्रत्युत्तर दिले जात आहे. तीन दिवसांपूर्वी इस्रायल आणि अमेरिकेच्या संयुक्त हल्ल्यात इराणचे सर्वोच्च नेते अयातुल्ला अली खामेनी यांचे निधन झाले. खामेनी यांना मारण्यासाठी अमेरिकेने हजारो कोटी रुपये खर्च केल्याची माहिती समोर आली आहे. ईराणमधील गुप्त माहिती गोळा करण्यासाठी अमेरिकेने आपल्या सेंट्रल इंटेलिजन्स एजन्सी (CIA)च्या अधिकाऱ्यांना प्रत्यक्ष जमिनीवर उतरवले होते. फायनान्शियल टाइम्सने दिलेल्या माहितीनुसार, CIA ने खामेनी यांना ट्रॅक करण्यासाठी ईराणच्या रस्त्यांवरील सीसीटीव्ही कॅमेरेदेखील हॅक केले होते अशी माहितीही समोर आली आहे.

गेल्या काही वर्षांपासून अली खामेनी हे इस्रायल आणि अमेरिकेच्या निशाण्यावर होते. ऑक्टोबर 2023 मध्ये इस्रायलवर झालेल्या हिजाबुल्लाह आणि हमासच्या हल्ल्यांनंतर अमेरिकेने CIA च्या अधिकाऱ्यांना ईराणमध्ये सक्रिय केले होते. Brown Edu च्या एका अहवालानुसार, 2023 ते 2025 या काळात अमेरिकेने ईराणमध्ये गुप्त माहिती गोळा करण्यासाठी आणि हे ऑपरेशन यशस्वी करण्यासाठी सुमारे 2.5 अब्ज डॉलर (अंदाजे 2 लाख 28 हजार कोटी रुपये) खर्च केले आहेत.

अयातुल्ला अली खामेनी यांच्या हत्येची घोषणा करताना अमेरिकेचे राष्ट्राध्यक्ष डोनाल्ड ट्रम्प यांनी अमेरिकन गुप्तचर यंत्रणेचे कौतुक केले होते. ट्रम्प यांनी म्हटले होते की, खामेनी आमच्या गुप्तचर यंत्रणेच्या ट्रॅकिंग सिस्टीमपासून बचावू शकले नाहीत. अमेरिकेने जगातील सर्वात मोठ्या शत्रूचा अंत केला आहे.’ ट्रम्प यांनी खामेनी यांची हत्या ही अमेरिकेसाठी मोठे यश असल्याचे म्हटले होते. खामेनी यांच्या हत्येनंतर डोनाल्ड ट्रम्प आणि इस्त्रायलचे पंतप्रधान नेतान्याहू यांना त्यांचा मृतदेह दाखवण्यात आला असल्याचीही माहिती समोर आली आहे.

वॉटसन ब्राउन एज्युकेशनच्या लिंडा ब्राउन यांनी मध्यपूर्वेतील अमेरिकन ऑपरेशन्सवरील खर्चाबाबत एका अहवालातून माहिती दिली आहे. या अहवालानुसार ऑक्टोबर 2023 पासून अमेरिकेने मध्यपूर्वेकडे विशेष लक्ष देण्यास सुरुवात केली होती. अमेरिकेने सर्वप्रथम इस्त्रायलला 21.7 अब्ज डॉलरचे लष्करी पॅकेज दिले. तसेच, मध्यपूर्वेतील देशांमध्ये ऑपरेशन्स चालवण्यासाठी 12.7 अब्ज डॉलरचा निधी राखून ठेवला. ही रक्कम ऑक्टोबर 2023 ते सप्टेंबर 2025 या कालावधीत खर्च करण्यात आली. त्यानंतर ऑक्टोबर 2025 ते फेब्रुवारी 2026 दरम्यान अमेरिकेने ईराण ऑपरेशनवर किती खर्च केला, याची माहिती अद्याप उपलब्ध नाही. त्यामुळे हा आकडा आणखी वाढू शकतो.