पाकिस्तान सुपर लीग 2026 स्पर्धेला 26 मार्चपासून सुरुवात होणार आहे. पाकिस्तान सुपर लीगचे आयोजन सुरळीतपणे पार पडावे, हे पीसीबीचे सध्याचे उद्दिष्ट आहे. या स्पर्धेला अवघ्या काही दिवसांचा अवधी शिल्लक असताना पाकिस्तान क्रिकेट बोर्ड अडचणीत आलं आहे. आयपीएल स्पर्धेला आव्हान देण्यासाठी पाकिस्तान क्रिकेट बोर्डाने तसंच वेळापत्रक निवडलं आहे. पण आता हाच निर्णय अंगलट येताना दिसत आहे. आयपीएल लोकप्रियतेपुढे पीएसएल कुठेच नाही. कारण अनेक खेळाडूंनी या स्पर्धेतून माघार घेण्याचा सपाटा लावला आहे. त्यात जे खेळाडू खेळणार आहेत त्यांनी अतिरिक्त पैशांची मागणी केली आहे. सूत्रांच्या माहितीनुसार, पीसीबी सध्या खेळाडू करार मोडून जात असल्याने अडचणीत आली आहे. त्यात इराण इस्राईल युद्धामुळे काही खेळाडूंनी मानधनात वाढ करण्याची मागणी केली आहे. मानधन वाढवून मागणाऱ्या खेळाडूंची नावं अद्याप समोर आलेली नाहीत.

रिपोर्टनुसार, स्पर्धा सुरू होण्यापूर्वीच माघार घेणऱ्या खेळाडूंवर काय करावी याबाबत पीसीबी संभ्रमात आहे. त्याबाबत अद्याप निर्णय झालेला नाही. दुसरीकडे, फ्रेंचायझींकडून दबाव वाढत आहे. स्पर्धेतून माघार घेतलेल्या खेळाडूंवर दोन ते चार वर्षांची बंधी घालावी अशी मागणी होत आहे. पण जर असं काही केलं तर पाकिस्तान सुपर लीग स्पर्धा अडचणीत येऊ शकते. कारण अशी कारवाई केली तर भविष्यात विदेशी खेळाडू स्पर्धेत भाग घेणार नाहीत. त्यामुळे खेळाडूंची जुळवाजुळव करणं कठीण जाईल. आयपीएल स्पर्धेच्या आयोजनासोबत पीएसएल आयोजन होत असल्याने चांगल्या खेळाडूंसाठी आयपीएलचा पर्याय असेल.

सध्या पाकिस्तान सुपर लीगची स्थिती पाहता पीसीबी आयसीसीकडे दाद मागण्याची शक्यता आहे. पीएसएल सोडून खेळाडू आयपीएल खेळत असल्याचा मुद्दा उपस्थित केला जाणार आहे. पीएसएलमध्ये एकदा निवड झाली तर त्यांनी लीग सोडू नये असा प्रस्ताव पीसीबी आयसीसीपुढे ठेवणार आहे. वेस्ट इंडिजचे खेळाडू गुडकेश मोती व जॉन्सन चार्ल्स, दसुन शनाका, ब्लेसिंग मुझारबानी, स्पेन्सर जॉन्सन व जेक फ्रेझर-मॅकगर्क, ओटनेल बार्टमन, रहमानुल्ला गुरबाज आणि टायमल मिल्स यांनी पीएलमधून माघार घेतली आहे.