Matka King: सैराट, फॅन्ड्री, नाळ यांसारख्या दर्जेदार प्रोजेक्ट्समधून मातीतल्या वास्तववादी कथा प्रेक्षकांपर्यंत पोहोचवणारे दिग्दर्शक-निर्माते नागराज पोपटराव मंजुळे (Nagraj Manjule)आता ओटीटीवर नव्या अवतारात झळकणार आहेत. मटका किंग या वेबसिरीजच्या माध्यमातून ते पुन्हा एकदा एका जबरदस्त कथानक घेऊन समोर आले आहेत. या वेब सिरीजची सध्या मनोरंजन विश्वात एकच चर्चा आहे. ओटीटीवर येणारी 'मटका किंग' (Matka King) ही वेब सिरीज केवळ एक गुन्हेगारी कथा म्हणून पाहणं मोठी चूक ठरेल. दिग्दर्शक नागराज मंजुळे यांची ही नवी निर्मिती एका अशा जगात घेऊन जाते, जिथे ‘मटका’ हा फक्त जुगार नसून सत्ता, गणित, मानसशास्त्र आणि सामाजिक वास्तव यांचा गुंता आहे.
‘मटका किंग’ची कथा एका अशा काळात घडते, जेव्हा मटका हा केवळ खेळ नव्हता, तर अनेकांच्या आयुष्याचा केंद्रबिंदू होता. या जगात पैसा जितक्या वेगाने येतो, तितक्याच वेगाने माणसाला गिळतोही. मालिका या जगाच्या ग्लॅमरला फक्त पृष्ठभागावर ठेवत नाही, तर त्यामागचं काळं वास्तव उघड करत जाते. एक अशी दुनिया, जी कधीकाळी जगली गेली होती, आणि एक असा व्यक्तिरेखा, जी निरीक्षण आणि अनुभवातून घडवली गेली,हे दोन्ही प्राइम व्हिडिओच्या “मटका किंग” मध्ये एकत्र येतात.
विजय वर्मासोबत काम करण्याबद्दल आणि बृज भाटी घडवण्याबद्दल, नागराज म्हणतात, “विजय एक उत्कृष्ट अभिनेता आहे, आणि त्याच्यातली मला सर्वात आवडणारी गोष्ट म्हणजे तो आपल्या व्यक्तिरेखेवर खूप खोलवर विचार करतो. प्रत्येक सीनमध्ये त्याचा पात्र असं का वागतोय, हे समजून घेण्यासाठी तो सतत प्रश्न विचारतो. आम्ही अनेकदा शूटिंगपूर्वी बसून सीनवर चर्चा करत असू. मी नेहमी थोडी मोकळीक ठेवतो, जेणेकरून शेवटच्या क्षणी बदल करता येतील, आणि विजयचे प्रश्न आम्हाला आमच्या मर्यादेपलीकडे घेऊन गेले. त्यामुळे प्रत्येक सीन अधिक चांगला बनला, कारण मटका किंग हा बारकाव्यांचा खेळ आहे. त्याने खूप संयमाने काम केले आणि या भूमिकेत आपलं पूर्ण मन ओतलं. आता जेव्हा तुम्ही हे पाहाल, तेव्हा तो खरोखर या मालिकेत हिरोसारखा दिसतो.”
मटका जगाबद्दल पहिली प्रतिक्रिया सांगताना, नागराज म्हणतात, “ जेव्हा आशीष (आर्यन) आणि अश्विनी (सिडवाणी) माझ्याकडे मटका किंगची कल्पना घेऊन आले, तेव्हा माझी पहिली प्रतिक्रिया अशी होती की हे माझ्या लहानपणी खूप लोकप्रिय होतं. नंतर जेव्हा आम्ही सिद्धार्थ (रॉय कपूर) सरांसोबत कथा आखत होतो, तेव्हा मला वाटलं की ही एक रंजक दुनिया आहे जी मी लहानपणापासून ओळखतो. त्यामुळे या कल्पनेबद्दल मी खूप उत्साहित झालो.”
बृज भाटी या व्यक्तिरेखेला समजून घेताना, त्यांनी सांगितले, “मी बृज भाटीसारखे अनेक लोक पाहिले आहेत. जेव्हा आम्ही ही व्यक्तिरेखा लिहित होतो, तेव्हा मला जाणवलं की तो एक अत्यंत बुद्धिमान माणूस आहे, जवळजवळ एखाद्या शास्त्रज्ञासारखा. त्याने एक खेळ निर्माण केला, आणि तो तयार करण्यासाठी धाडस लागतं. पण त्याची खरी ताकद म्हणजे त्याची प्रामाणिकता आहे.”
अभय कोराणे यांनी क्रिएट आणि लिहिलेली, तसेच नागराज पोपटराव मंजुळे यांनी क्रिएट, लिखित आणि दिग्दर्शित केलेल्या या मालिकेत विजय वर्मा, कृतिका कामरा, सई ताम्हणकर, सिद्धार्थ जाधव, भूपेंद्र जडावत आणि गुलशन ग्रोवर प्रमुख भूमिकांमध्ये आहेत. याशिवाय भारत जाधव, गिरीश कुलकर्णी, जेमी लीव्हर, किशोर कदम, सायरस सहुकार, अर्पिता सेठिया, संभाजी तांगडे, इश्तियाक खान, संजीव जोटांगिया आणि सिमरन अश्विनी देखील महत्त्वाच्या भूमिकांमध्ये दिसणार आहेत.
17 एप्रिलपासून Amazon Prime Video वर प्रदर्शित होणारी ही मालिका, मजबूत लेखन, वास्तववादी दिग्दर्शन आणि दमदार अभिनयामुळे या वर्षातील सर्वात चर्चेत राहणाऱ्या प्रोजेक्ट्सपैकी एक ठरू शकते. जर तुम्हाला ‘रॉ’, वास्तववादी आणि पात्रप्रधान कथा आवडत असतील, तर ‘मटका किंग’ तुमच्यासाठी परफेक्ट बिंज असू शकते.
