IPOs Next Week : पुढच्या आठवड्यात 4 आयपीओमध्ये गुंतवणुकीची संधी, 3 कंपन्या होणार सूचीबद्ध
ET Marathi April 12, 2026 08:45 PM
मुंबई : नवीन आठवड्यात आयपीओ बाजारात जास्त हालचाल नसेल. केवळ दोन नवीन आयपीओ येणार आहेत. तसेच आधीच सुरू झालेल्या दोन आयपीओंमध्येही गुंतवणूक करण्याची संधी असेल. याशिवाय या आठवड्यात दोन कंपन्यांचे शेअर्स बाजारात सूचीबद्ध होणार आहेत.
सिटियस ट्रान्सनेट InvIT आयपीओ
सिटियस ट्रान्सनेट InvIT आयपीओ हा १,३४० कोटींचा बुक-बिल्डिंग इश्यू आहे. आयपीओ १७ एप्रिल रोजी खुला होईल आणि २१ एप्रिल रोजी बंद होईल. प्राईस बँड अद्याप जाहीर करण्यात आलेली नाही. हा InvIT विशेषतः रस्त्यांसारख्या वाहतूक पायाभूत सुविधांमध्ये गुंतवणूक करण्यासाठी तयार करण्यात आला आहे. सुरुवातीला या कंपनीकडे नऊ राज्यांमध्ये पसरलेले ३,४०६.७१ लेन किलोमीटरचे पोर्टफोलिओ आहे. यामध्ये सात टोल प्रकल्प आणि तीन ॲन्युइटी प्रकल्पांचा समावेश आहे. शेअर्सचे वाटप २२ एप्रिल रोजी आणि लिस्टिंग २४ एप्रिल रोजी एनएसई (NSE) व बीएसई (BSE) वर होईल.
मेहुल टेलिकॉम आयपीओ
हा एसएमई आयपीओ १७ एप्रिल रोजी उघडणार आहे. या आयपीओमध्ये गुंतवणूकदारांना २१ एप्रिलपर्यंत बोली लावता येईल. किंमत बँड प्रति शेअर ९६ रुपये ते ९८ रुपये आहे. तर लाॅट आकार १,२०० शेअर्सचा आहे. कंपनी आयपीओतून २७.७३ कोटी उभारण्यासाठी २८,२९,६०० शेअर्स जारी करणार आहे. शेअर्सचे वाटप २२ एप्रिल रोजी होणार आहे. कंपनीचे शेअर्स २४ एप्रिल रोजी बीएसई एसएमई (BSE SME) वर पदार्पण करतील.
आधीच उघडलेले आयपीओ
ओम पॉवर ट्रान्समिशन आयपीओ
हा १५०.०६ कोटींचा आयपीओ ९ एप्रिल रोजी उघडला असून १३ एप्रिल रोजी बंद होणार आहे. आयपीओला आतापर्यंत ७१% सबस्क्रिप्शन मिळाले आहे. किंमत पट्टा प्रति शेअर १६६-१७५ रुपये आहे. लॉट साईज ८५ शेअर्स आहे. १५ एप्रिल रोजी शेअर्सचे वाटप निश्चित होण्याची शक्यता आहे. हे शेअर्स १७ एप्रिल रोजी बीएसई (BSE) आणि एनएसई (NSE) वर सूचीबद्ध होणार आहेत.
प्रॉपशेअर सेलेस्टिया आयपीओ
ही प्रॉपर्टी शेअर इन्व्हेस्टमेंट ट्रस्ट (REIT) ची तिसरी योजना आहे. कंपनीचे उद्दिष्ट २४४.६५ कोटी रुपये उभारण्याचे आहे. हा इश्यू १० एप्रिल रोजी सुरू झाला आणि सध्या तो ४७% सबस्क्राईब झाला आहे. किंमत पट्टा प्रति शेअर १०,००,०००-१०,५०,००० रुपये आहे. अंतिम तारीख १६ एप्रिल आहे. बीएसई (BSE) वर लिस्टिंग २४ एप्रिल रोजी होण्याची शक्यता आहे.
३ कंपन्यांचे लिस्टिंग
या आठवड्यात तीन कंपन्या सूचीबद्ध होतील. सेफ्टी कंट्रोल्स अँड डिव्हाइसेस आणि एमियाक टेक्नॉलॉजीजचे शेअर्स १३ एप्रिल रोजी बीएसई एसएमई प्लॅटफॉर्मवर सूचीबद्ध होतील. ओम पॉवर ट्रान्समिशनचे शेअर्स १७ एप्रिल रोजी एनएसई आणि बीएसईवर सूचीबद्ध होणार आहेत.
