भारतातील महागाई वाढ: भारतीय ग्राहकांसाठी मार्च हा महागाईचा महिना ठरला आहे. ताज्या आकडेवारीनुसार, देशातील अन्नधान्य महागाई दर 3.87% पर्यंत वाढला आहे. फेब्रुवारीच्या तुलनेत ही वाढ लक्षणीय असून जागतिक पातळीवर इराण-इस्रायल संघर्ष हे त्यामागचे प्रमुख कारण असल्याचे तज्ज्ञांचे म्हणणे आहे. भारतातील किरकोळ चलनवाढीचा दर फेब्रुवारीमध्ये 3.21 टक्क्यांवरून मार्चमध्ये 3.40 टक्क्यांवर पोहोचला आहे. ही वाढ अन्न आणि पेय पदार्थांच्या वाढत्या किमतींमुळे तसेच ऊर्जेच्या खर्चात प्रचंड वाढ झाल्यामुळे झाली आहे.
पश्चिम आशियातील सध्याच्या तणावाचा परिणाम लोकांच्या आहारावरही झाला आहे. मात्र, ही वाढ होऊनही हा आकडा 4 च्या खाली राहिला आहे, जो सर्वसामान्यांना दिलासा देणारा नाही.
आकडेवारीनुसार, अन्नधान्य महागाई फेब्रुवारीमध्ये 3.47 टक्क्यांवरून मार्चमध्ये 3.87 टक्क्यांवर पोहोचली आहे. याचा अर्थ दैनंदिन खाद्यपदार्थांच्या किमती वाढल्या असून त्याचा थेट परिणाम सर्वसामान्यांच्या खिशावर होणार आहे. ग्रामीण आणि शहरी आकडेवारीची तुलना केल्यास, खेड्यांमध्ये अन्नधान्य महागाई 3.96 टक्के नोंदवली गेली, तर शहरी भागात ती 3.71 टक्के होती. यावरून महागाईचा परिणाम केवळ शहरांमध्येच नव्हे तर ग्रामीण भागातही जाणवत असल्याचे स्पष्ट होते.
रिझर्व्ह बँकेने नुकताच रेपो दर कायम ठेवण्याचा निर्णय घेतला आहे. यानंतर महागाईचे आकडे जाहीर करण्यात आले आहेत. RBI ने 8 एप्रिल रोजी झालेल्या बैठकीत सावध पवित्रा घेतला. केंद्रीय बँक तेलाच्या वाढत्या किमतींवर बारीक लक्ष ठेवून आहे, कारण त्याचा थेट परिणाम अर्थव्यवस्थेवर होऊ शकतो. आरबीआयने हेही स्पष्ट केले आहे की, गरज भासल्यास चलनातील कमालीचा चढ-उतार नियंत्रित करण्यासाठी उपाययोजना करता येतील.
ताज्या आकडेवारीनुसार, महागाईचा प्रभाव राज्यानुसार बदलत आहे. तेलंगणात सर्वाधिक 5.83 टक्के महागाई दर नोंदवला गेला, त्यानंतर आंध्र प्रदेश 4.05 टक्के, कर्नाटक 3.96 टक्के, तामिळनाडू 3.77 टक्के आणि राजस्थान 3.64 टक्के आहे.
