आयपीएल 2026 स्पर्धेत 15 वर्षांच्या वैभव सूर्यवंशीने सर्वांचं लक्ष वेधून घेतलं आहे. त्याच्या आक्रमक खेळीमुळे भल्याभल्या गोलंदाजांना घाम फुटला आहे. त्याने सनरायझर्स हैदराबादविरुद्धच्या सामन्यात 36 चेंडूत शतक ठोकलं. त्याची फलंदाजी पाहून कोणालाही आश्चर्याचा धक्का बसल्याशिवाय राहणार नाही. इतक्या कमी वयात इतकं सगळं करणं सोपं नाही. त्यामुळे अनेकांनी त्याच्या वयावरही प्रश्नचिन्ह उपस्थित केलं. पण यात कुठेच काही आढळलं नाही. आता वैभव सूर्यवंशीच्या बॅटची तपासणी करण्याची मागणी होत आहे. पाकिस्तानात तर त्याच्या बॅटमध्ये चिप असल्याची हास्यास्पद चर्चा रंगली आहे. वैभव सूर्यवंशीचे फटके पाहून पाकिस्तानचा क्रिकेट तज्ज्ञ नौमान नियाजने हास्यास्पद संशय व्यक्त केला आहे. त्याचा संशय आणि डोकं पाहून हसायला येणं सहाजिकच आहे. नौमानने मस्करीतच सांगितलं की, 15 वर्षीय युवा खेळाडू एआय चिप असलेल्या बॅटने फलंदाजी करत आहे. तेव्हाच इतक्या जोरात फटकेबाजी करताना दिसत आहे.
नौमान नियाजने वैभव सूर्यवंशीबाबत आपल्या कार्यक्रमात सांगितलं की, ‘जरा विचार करा.. हा कोणत्या प्रकारचा मुलगा आहे. त्याची बॅट तपासली पाहीजे. त्याची बॅट लॅबमध्ये पाठवली पाहीजे. मला वाटतं की त्याच्या बॅटमध्ये एआय चिपचा वापर केला गेला आहे. काय खेळाडू आहे. जेव्हा तुम्ही 18 वर्षांचे होते तेव्हा तुमचे बायसेप्स आणि ट्रायसेप्स होतात. हा खेळाडू 15 वर्षांचा आहे. हा खेळाडू जेव्हा जन्माला तेव्हा विराट कोहली वर्ल्ड चॅम्पियन होता. वैभव सूर्यवंशीच्या मनगटात जोर आहे. तो 360 डिग्रीचा वापर करतो.’
वैभव सूर्यवंशी कोणताही गोलंदाज समोर असला की आक्रमण करायला घाबरत नाही. त्याने दिग्गज गोलंदाजांना चौकार षटकार मारले आहेत. आयपीएल स्पर्धेतील आठ सामन्यात त्याने 357 धावा केल्या आहेत. त्याची बॅटिंग एव्हरेज हा 44.6 चा आहे. तसेच स्ट्राईक रेट हा 234.86 चा आहे. त्याने आतापर्यंत एक शतक आणि दोन अर्धशतकं ठोकली आहेत. त्याने सर्वाधिक 32 षटकार मारले आहेत. वैभव सूर्यवंशी उर्वरित सामन्यातही अशीच कामगिरी करण्याची शक्यता आहे. कारण वैभव सध्या जबरदस्त फॉर्मात आहे.
