रोव्हमॅन पॉवेल आणि मनीष पांडे या जोडीने केलेल्या निर्णायक खेळीच्या जोरावर कोलकाता नाईट रायडर्सने आयपीएल स्पर्धेच्या 19 व्या मोसमातील (IPL 2026) 65 व्या सामन्यात मुंबई इंडियन्सवर 4 विकेट्सने विजय मिळवला आहे. मुंबईने केकेआरसमोर कोलकातामधील ऐतिहासिक इडन गार्डन्समध्ये 148 धावांचं आव्हान ठेवलं होतं. केकेआरने हे आव्हान 7 बॉलआधी आणि 4 विकेट्स राखून पूर्ण केलं. केकेआरने 18.5 ओवरमध्ये 6 विकेट्सच्या मोबदल्यात विजयी धावा केल्या. केकेआरने यासह 2 गुणांची कमाई केली. केकेआरचा हा 19 व्या मोसमातील 13 सामन्यांमधील सहावा विजय ठरला. केकेआरचा हा गेल्या 7 सामन्यांमधील सहावा विजय ठरला. तसेच केकेआरने घरच्या मैदानात विजयी हॅट्रिक पूर्ण केली. तर मुंबईचा नववा पराभव ठरला. मुंबई लखनौ सुपर जायंट्सनंतर 19 व्या मोसमात 9 सामने गमावणारी दुसरी टीम ठरली.