Mangesh Desai on Dharmaveer: मंगेश देसाई (Mangesh Desai) निर्मित 'धर्मवीर' (Dharmaveer) या सिनेमाच्या दोन्ही भागांना मिळालेल्या प्रचंड यशानंतर या चित्रपटाच्या तिसऱ्या पार्टची प्रचंड चर्चा होत आहे. 'धर्मवीर' सिनेमाचा तिसरा भाग लवकरच प्रेक्षकांच्या भेटीस येणार असल्याची माहिती आहे. दरम्यान, तिसऱ्या पार्टबाबत एक मोठी अपडेट समोर येत आहे. या सिनेमाचे शीर्षक बदलणार असल्याची माहिती समोर आली आहे. या चित्रपटासंदर्भात दिलेल्या मुलाखतीत त्यांनी ही माहिती उघड केली. तसेच या बहुचर्चित सिनेमाबाबत अनेक महत्त्वाच्या गोष्टी सांगितल्या.
'मटा कट्ट्यावर' मंगेश देसाई यांनी 'धर्मवीर' या सिनेमाच्या तिसऱ्या भागाबाबात आणि शीर्षकाबाबत मोठी माहिती दिली. हा सिनेमा नेमका कधी प्रदर्शित होणार? याबाबतही त्यांनी माहिती दिली. सिनेमाच्या रिलीज डेटबाबत मंगेश देसाईंनी सांगितलं की, ''धर्मवीर' या सिनेमाची कथा पूर्ण झाली आहे. वर्षाअखेरीस या सिनेमाचं चित्रीकरण करण्याचं नियोजन आहे. 2027 साली हा सिनेमा प्रेक्षकांच्या भेटीस येईल', अशी माहिती मंगेश देसाई यांनी दिली. माहितीनुसार, प्रवीण तरडे हे या सिनेमाचं दिग्दर्शन करणार आहेत.
सिनेमाच्या शीर्षकाबाबत मंगेश देसाई म्हणाले, ''धर्मवीर' या सिनेमाचं शीर्षक 'धर्मवीर 3' कायम राहणार नसून, बदलणार आहे. नव्या शीर्षकाची नोंदणी करण्यात आली आहे. नाव बदलण्याचा विचार आम्ही करत आहोत. पंरतु, नव्या शीर्षकावरही शिक्कामोर्तब होणं बाकी आहे. हा सिनेमा अत्यंत रंजक असणार एवढं मात्र नक्की', असं मंगेश देसाई म्हणाले. या सिनेमाच्या कथानकात नाविन्य आणि धक्कादायक वास्तव पाहायला मिळणार, असा खुलासाही मंगेश देसाईंनी मुलाखतीत केला.
View this post on Instagram
'धर्मवीर' या सिनेमाच्या पुढच्या भागाबाबत मंगेश म्हणतात, 'हा सिनेमा केवळ एक सिक्वेल नसणार तर, प्रेक्षकांसाठी एक सिनेमॅटिक अनुभव असणार आहे. जे प्रेक्षकांनी आतापर्यंत पाहिलं नसेल, ते या चित्रपटातून अनुभवता येणार आहे', असंही मंगेश देसाई म्हणाले. दरम्यान, 'धर्मवीर' या सिनेमाच्या तिसऱ्या पार्टबाबत प्रेक्षकवर्गामध्ये उत्सुकता शिगेला पोहोचली असून, हा सिनेमा 2027 साली प्रेक्षकांच्या भेटीस येणार आहे.
महत्त्वाच्या इतर बातम्या:
पोट धरुन हसवणारा सिनेमा ते काळजाचा ठोका चुकवणारा हॉरर फिल्म; जून महिन्यात किती सिनेमे रिलीज होणार?
