Yashasvi Jaiswal on Harsha Bhogle: श्रीलंकेचा गोलंदाज असिथा फर्नांडोसोबत मैदानावर झालेल्या वादानंतर यशस्वी जैस्वालने पहिल्यांदाच प्रतिक्रिया दिली आहे. फर्नांडोने त्याला काय म्हटले हे जाणून घेतल्याशिवाय लोकांनी कोणताही निष्कर्ष काढू नये, असे तो म्हणाला. जैस्वालने सोशल मीडियावर लिहिले, "जर कोणी मर्यादा ओलांडली, तर आपल्याला त्यांना खडसावलेच पाहिजे. हा भारत आहे, आम्ही लढू आणि प्रत्युत्तर देऊ."
ही संपूर्ण घटना कोलंबो येथे भारत आणि श्रीलंका यांच्यातील दुसऱ्या कसोटीच्या पहिल्या दिवशी घडली. फर्नांडोने जैस्वालला 45 धावांवर बाद केले होते. त्यानंतर श्रीलंकेच्या गोलंदाजाने त्याला आक्रमकपणे 'सेंड-ऑफ' दिला. पॅव्हेलियनकडे परतत असलेला जैस्वाल मागे वळला आणि फर्नांडोच्या दिशेने गेला. त्यांच्यात वाद झाला आणि जैस्वालचे हेल्मेट फर्नांडोच्या कपाळाला लागले. श्रीलंकेचा कर्णधार धनंजय डी सिल्वा आणि इतर खेळाडूंनी दोघांना वेगळे करण्यासाठी हस्तक्षेप केला.
Yashasvi Jaiswal to Harsha Bhogle on yesterday's incident. pic.twitter.com/pFVNIIaA7u
— Mufaddal Vohra (@mufaddal_vohra) August 24, 2026
समालोचक हर्षा भोगले यांच्या एका व्हिडिओवर जयस्वालने प्रतिक्रिया दिल्यानंतर हा मुद्दा पुन्हा चर्चेत आला. क्रिकबझने भोगले यांचा व्हिडिओ इन्स्टाग्रामवर पोस्ट केला, ज्यामुळे फर्नांडोला जाब विचारून जयस्वालने मर्यादा ओलांडली का? असा प्रश्न उपस्थित झाला. त्याच व्हिडिओच्या कमेंट सेक्शनमध्ये जयस्वालने लिहिले, "त्याने काय म्हटले हे तुम्हाला माहीत नसेल, तर कृपया लगेचच मत देऊ नका. जर कोणी मर्यादा ओलांडली, तर आपल्याला त्यांना सांगावेच लागेल. हा भारत आहे, आम्ही लढू आणि प्रत्युत्तर देऊ." त्याची ही कमेंट व्हायरल झाली.
दुसरीकडे यशस्वी जैस्वालने तो काय बोलला हे सांगितलं नाही. त्याच्या वक्तव्यावरून असे सूचित होते की, हा वाद केवळ फर्नांडोला दिलेल्या 'सेंड-ऑफ'पुरता मर्यादित नव्हता. फर्नांडोने असे काहीतरी म्हटले होते ज्यामुळे त्याने अशी प्रतिक्रिया दिली. मात्र, फर्नांडोने नेमके काय म्हटले हे स्पष्ट केले नाही. दोन्ही खेळाडूंमधील संभाषणाचा संपूर्ण तपशील अद्याप समोर आलेला नाही. बाद होण्यापूर्वी जैस्वालने फर्नांडोच्या षटकात तीन चौकार मारले होते. त्यानंतर फर्नांडोचा चेंडू आत आला आणि जैस्वाल त्रिफळाचीत झाला.
इतर महत्वाच्या बातम्या
