: पुण्यासह परिसराला हादरवून सोडणारी एक घटना समोर आली आहे. या ठिकाणी प्रेयसीला लॉजवर बोलवून चाकूने वार करत तिची हत्या करुन प्रियकराने देखील गळफास घेऊन आत्महत्या केल्याचा धक्कादायक प्रकार घडला आहे. पिंपरी चिंचवडच्या खराळवाडी परिसरातील हॉटेल राज प्लाझामध्ये ही खळबळजनक घटना घडली. दरम्यान, प्रियकराच्या हल्ल्यात गंभीर जखमी झालेल्या प्रेयसीला तत्काळ रुग्णालयात हलवण्यात आले. मात्र तेथे डॉक्टरांनी तिला मृत घोषित केले. या घटनेमुळे पुण्यात एकच खळबळ उडाली आहे.
याबाबत पोलिसांकडून मिळालेल्या माहितीनुसार, नितेश नरेश मिनेकर आणि करिश्मा इश्वर घुमाने असं या मृत प्रेमीयुगुलाचं नाव आहे. गुरुवारी दुपारी साडेचार वाजण्याच्या सुमारास पिंपरीमधल्या खराळवाडीत असलेल्या हॉटेल राज पॅलेस या लॉजवर गुरुवारी ही घटना घडली. चार वाजण्याच्या सुमारास या दोघांनी लॉजवर रूम बुक केली होती. मात्र त्यानंतर त्यांच्या खोलीतून भांडणाचे आवाज येऊ लागल्यानंतर लॉजमधील कर्मचाऱ्यांनी याची माहिती पोलिसांना दिली. माहिती मिळताच पोलिसांनी तत्काळ लॉजवर धाव घेत रूमचा दरवाजा ठोठावला. मात्र तो दरवाजा उघडत नव्हता. बराच वेळ झाला तरी नितेश दरवाजा उघडत नसल्यामुळे शेवटी पोलिसांनी दरवाजा तोडून आतमध्ये प्रवेश केला असता करिश्मा रक्ताच्या थोराळ्यात तर नितेशने गळफास घेतलेल्या अवस्थेत दिसून आला.
दरम्यान, पोलिसांनी जखमी अवस्थेत करिश्माला जवळच्या रुग्णालयात दाखल केले. मात्र डॉक्टरांनी तिला मृत घोषित केलं. याप्रकरणी पोलिसांनी गुन्हा दाखल केला असून पोलिस पुढील तपास करत आहे. दरम्यान, या घटनेमुळे पुण्यात एकच खळबळ उडाली असून दोघांमध्ये नेमका काय वाद झाला असेल ज्यामुळे नितेश याने हे कृत्य याबाबत नागरिकांमध्ये चर्चा आहे.
