BJP Release Manifesto for Maharashtra Assembly Election 2024: राज्यातील विधानसभा निवडणुकीसाठी भाजपने आपला जाहीरनामा प्रसिद्ध केला आहे. पक्षाचे ज्येष्ठ नेते आणि गृहमंत्री अमित शाह यांनी पक्षाचा जाहीरनामा प्रसिद्ध केला आहे. भाजपच्या जाहीरनाम्यात राज्यातील जनतेसाठी मोठी आश्वासने देण्यात आली आहेत. याबाबत सविस्तर माहिती जाणून घेऊयात.

भाजपचा जाहीरनाम्याबाबत बोलताना उपमुख्यमंत्री देवेंद्र फडणवीस यांनी म्हटले की, आम्ही सरकार आल्यानंतर शेतकऱ्यांची कर्जमाफी करणार आहोत. तसेच लाडक्या बहिणींना 1500 ऐवजी 2100 रुपये देण्यात येणार आहेत. त्याच बरोबर राज्यात 25 लाख रोजगाराच्या संधी उपलब्ध करणार आहोत. तसेच सरकार स्थापनेच्या 100 दिवसांमध्ये व्हिजन महाराष्ट्र 2029 सादर करू.

अमित शहा काय म्हणाले ?

जाहीरनामा सादर करताना भाषणात अमित शाह म्हणाले की, 'मोदीजींनी वक्फ बोर्डात सुधारणा करण्यासाठी संसदेत कायदा आणला आहे. महाविकास आघाडीचे लोक या कायद्याला विरोध करत आहेत. वक्फ कायद्याला विरोध म्हणजे येत्या काही दिवसांत वक्फ बोर्ड तुमची मालमत्ता जाहीर करणार आहे. शरद पवारांवर भाष्य करताना ते म्हणाले की, 'शरद पवार यूपीए सरकारमध्ये 10 वर्षे मंत्री होते. महाराष्ट्रातील जनतेसाठी तुम्ही काय केले? 10 वर्षात यूपीए आणि आघाडी सरकारने 1 लाख 91 हजार कोटी रुपये दिले. तर 2014 ते 2024 या काळात मोदी सरकारने महाराष्ट्राला 10 लाख कोटी रुपयांहून अधिक निधी दिला.

जाहीरनाम्यातील प्रमुख मुद्दे

• महाराष्ट्रात कौशल्य जनगणना होणार
• छत्रपती शिवाजी महाराज आकांक्षा केंद्र बांधण्यात येणार
• स्वामी विवेकानंद फिटनेस कार्ड लॉन्च केले जाईल
• शिवकालीन गड-किल्ले संवर्धन करणार
• वंचित, शेतकरी आणि महिलांवर लक्ष केंद्रित केले जाईल
• प्रत्येक गरिबाला अन्न आणि निवारा देणार
• वृद्धांची पेन्शन वाढवून 2100 रुपये करणार
• जीवनावश्यक वस्तुंचे भाव स्थिर ठेवणार
• 25 लाख रोजगारांची निर्मिती
• 10 लाख विद्यार्थ्यांना वेतन
• महाराष्ट्राला फिनटेक आणि एआयचं हब करणार
• एअरोनॉटिकल आणि स्पेसमध्ये उत्पादनावर काम करणार
• अक्षय अन्न योजना
• महारथी एआय लॅब्स
• शेतमालाची हमी भावापेक्षा कमी भावात खरेदी होत असल्यास भावात्तम रक्कम शेतकऱ्यांच्या खात्यात टाकणार