गँगस्टर लॉरेन्स बिश्नोईचा भाऊ अनमोल बिश्नोई याला अमेरिकेत अटक करण्यात आली आहे. अनमोलला कॅलिफोर्नियामध्ये ताब्यात घेण्यात आले आहे. तुरुंगात बंद गँगस्टर लॉरेन्सचा धाकटा भाऊ अनमोलच्या प्रत्यार्पणासाठी मुंबई पोलिसांनी अमेरिकेला प्रस्ताव पाठवला होता. अमेरिकन अधिकाऱ्यांनी सांगितले होते की, अनमोल बिश्नोई त्यांच्या देशात आहे. अनमोल बिश्नोई हा बाबा सिद्दीकी हत्येसह अनेक प्रकरणांमध्ये वॉन्टेड आहे. सलमान खानच्या अपार्टमेंटबाहेर झालेल्या गोळीबार प्रकरणातही त्याचे नाव समोर आले आहे.

गेल्या महिन्यात भारत सरकारने अजामीनपात्र कलमांतर्गत त्याच्या विरोधात वॉरंट जारी केले होते. मुंबई पोलिसांच्या गुन्हे शाखेने अनमोल बिश्नोईच्या प्रत्यार्पणाची प्रक्रिया सुरू केल्यानंतर अवघ्या काही आठवड्यांनंतर ही कारवाई झाली आहे. अनमोल बिश्नोई हा राष्ट्रवादी काँग्रेसचे नेते बाबा सिद्दीकी खून प्रकरण आणि अभिनेता सलमान खानच्या वांद्रे येथील गॅलेक्सी अपार्टमेंटमधील गोळीबार प्रकरणातील फरार आरोपी आहे.

राष्ट्रीय तपास संस्थेने (एनआयए) अनमोल बिश्नोईविरुद्ध नोंदवलेल्या दोन गुन्ह्यांव्यतिरिक्त त्याच्यावर 18 अन्य गुन्हेही नोंदवले आहेत. नुकतेच एनआयएने अनमोलला अटक करण्यात मदत करणाऱ्याची माहिती देणाऱ्याला १० लाख रुपयांचे बक्षीस जाहीर केले होते.

एनआयएने लोकांना अनमोल बिश्नोईच्या ठावठिकाणाविषयी कोणतीही माहिती देण्याची विनंती केली आहे, परंतु अद्याप गुंड अनमोल त्यांच्या आवाक्याबाहेर आहे. त्याचे गुन्हेगारी नेटवर्क सक्रिय आहे, भारतातील मोस्ट वॉन्टेड लोकांपैकी तो एक आहे.

अनमोल बिश्नोईने आपला भाऊ लॉरेन्सच्या पावलावर पाऊल ठेवत गुन्हेगारीच्या जगात प्रवेश केला आहे. 7 ऑक्टोबर 2021 रोजी अनमोलची जामिनावर सुटका झाली. 2023 मध्ये तपास यंत्रणेने त्याच्याविरुद्ध आरोपपत्र दाखल केले होते. बनावट पासपोर्टवर तो भारतातून पळून गेला होता. अनमोल बिश्नोईने आपली ठिकाणे बदलत राहिली आणि गेल्या वर्षी केनिया आणि यावर्षी कॅनडामध्ये दिसला.