Kashedi Ghat: मुंबई-गोवा महामार्गावरील कशेडी घाटातील दोन्ही बोगदे हे लवकरच पूर्ण क्षमतेने सुरू करण्यात येणार आहेत. 26 जानेवारीपासून हे दोन्ही बोगदे सुरू होणार असल्याचे कळते आहे. गेल्या 18 वर्षांपासून या दोन्ही बोगद्यांची प्रतीक्षा होती. हे दोन्ही बोगदे बाजूलाच आहेत. त्यातूनही 45 मिनिटांचे अंतर आता 8 मिनिटात होणार असल्याचा दावाही करण्यात आला आहे. हे दोन किलोमीटरचे बोगदे ये-जा करण्यासाठी आहेत.

कशेडी येथील पहिल्या बोगद्यातून दोन्ही बाजूकडील वाहतूक सुरळीत सुरू आहे. दुसऱ्या बोगद्यात तात्पुरत्या स्वरूपातील वीजपुरवठा कार्यान्वित करण्यात आला होता. कायमस्वरूपी वीजपुरवठ्यासाठी विद्युतीकरणाचे काम हाती घेण्यात आले आहे. विद्युतीकरणाची कामे जवळपास पूर्ण झाल्यावर दोन्ही बोगदे 26 जानेवारीपासून पूर्ण क्षमतेने वाहतुकीसाठी खुले होतील, असे कळते. कशेडी येथील दुसऱ्या बोगद्यात आता पंखे बसविण्याचे काम हाती घेण्यात आले असून रायगडमधील भोगावजवळ एका पुलावर स्लॅब टाकण्याचे कामही सुरू आहे.

मुंबई गोवा महामार्गावर असलेला हा कशेडी घाट अवघड व धोकेदायक म्हणून ओळखला जातो. मुंबई-गोवा महामार्गावरील कशेडी घाट येथील प्रतीक्षेत असलेले दोन्ही बोगदे प्रजासत्ताक दिनाच्या मुहूर्तावर पूर्ण क्षमतेने वाहतुकीसाठी सुरू करण्यात येणार आहेत. कशेडी घाटाला पर्याय म्हणून येथील दोन्ही बोगद्याचे काम प्रगतीपथावर आहे. गणेशोत्सवासाठी कोकणात येणा-या भाविकांसाठी एक बोगदा सुरू करण्यात आला होता. मात्र त्यांनतर काही त्रुटी आढळल्याने दोन्ही बोगदे बंद करण्यात आले होते. पावसाच्या पाण्याची गळती हाही एक मुद्दा होता. या महामार्गाच्या अपूर्ण कामांमुळे गोवा अन् कोकणला जाणारे वाहनधारक संतप्त झाले होते. परंतु या महामार्गावरील कशेडीतील दोन्ही बोगदे 26 जानेवारीपासून पूर्ण क्षमतेने वाहतुकीसाठी खुले होणार आहेत. गेल्या काही दिवसांपासून हे बोगदे बंद होते.

मुंबई-गोवा हा महामार्ग कोकणवासीयांसाठी महत्वाचा आहे. 503 किलोमीटरचा महामार्ग कोकणातून जातो. मुंबई कोकणातील असंख्य चाकरमाने राहतात. ते गणपती, होळी किंवा इतर वेळी गावी जात असतात. त्या काळात रेल्वे आरक्षण फुल्ल असते. त्यामुळे त्यांच्यासाठी रस्ते प्रवास सोयीचा होतो. परंतु महामार्गाचे काम पूर्ण नसल्यामुळे त्यांना अनेक अडचणी येतात. परंतु आता ही अडचण दूर होणार असल्याचे कळते आहे. मुंबई-गोवा महामार्गावरील कशेडी घाटातील दोन्ही बोगदे नवीन वर्षाच्या सुरूवातीला म्हणजेच 26 जानेवारीपासून पूर्ण क्षमतेने वाहतुकीसाठी खुले होणार असल्याची माहिती राष्ट्रीय महामार्ग विभागचे अभियंता पंकज गोसावी यांनी एका मराठी वृत्तपत्राला दिली आहे.