नागपूरमध्ये उसळलेल्या दंगलीत गंभीर जखमी झालेल्या तरुणाचा उपचारांदरम्यान मृत्यू झाला. त्यामुळं नागपूर दंगलीचा हा पहिला बळी ठरला आहे. इरफान अन्सारी असं मृत्यू झालेल्या तरुणाचं नाव आहे.

- ज्येष्ठ अर्थतज्ज्ञ डॉ. विजय केळकर यांना अर्थशास्त्र क्षेत्रातल्या अतुलनीय योगदानाबद्दल २०२५ या वर्षाचा पुण्यभूषण पुरस्कार जाहीर.

- २ लाख रुपये रोख, स्मृतीचिन्ह आणि मानपत्र असं या पुरस्काराचं स्वरुप.

- इटलीतील रोम येथे १३ वी भारत-इटली लष्करी सहकार्य गट बैठक संपन्न

- द्विपक्षीय लष्करी सहकार्य वाढवण्यासाठी देवाणघेवाण कार्यक्रम, क्षमता विकास आणि संरक्षण गुंतवणूक यासह महत्त्वपूर्ण चर्चा.

- दोन्ही देशांनी धोरणात्मक संबंध दृढ करण्याची वचनबद्धता दर्शवली.

मुंबई विद्यापीठाच्या वार्षिक अधिसभेच्या (सिनेट) बैठकीला आज मोठ्या गोंधळात सुरुवात झाली. सकाळी सभेसाठी येणाऱ्या सिनेट सदस्यांच्या गाड्या अडवल्याने ते आक्रमक झाले आणि विद्यापीठ प्रशासनाच्या विरोधात काळे कपडे घालून निषेध नोंदवला. युवासेना पदवीधर सिनेट सदस्य आणि बुक्टू प्राध्यापक संघटनेने विद्यापीठाच्या मनमानी कारभारावर जोरदार आक्षेप घेतला असून, सिनेट पूर्व बैठकीवर बहिष्कार टाकल्यानंतर आता प्रत्यक्ष अधिसभेत प्रशासनाला जाब विचारत आहेत. दुपारपर्यंतच्या कामकाजात दोन वेळा निलंबनाची धमकी दिल्यानंतर संतप्त सिनेट सदस्यांनी वेलमध्ये उतरून ठिय्या आंदोलन सुरू केले आहे.

नाशिक जिल्ह्यात कायदा आणि सुव्यवस्था अबाधित राखण्यासाठी १ एप्रिलपर्यंत शस्त्रबंदी आणि जमावबंदी आदेश लागू करण्यात आले आहेत. मुंबई पोलिस अधिनियम 1951 चे कलम 37 (1) (3) अन्वये हा निर्णय घेण्यात आला आहे. आगामी सण-उत्सव, ईद आणि नागपूरमधील घटनेच्या पार्श्वभूमीवर हा प्रतिबंधात्मक आदेश जारी करण्यात आला असून, या कालावधीत सभा व मिरवणुकांसाठी प्रशासनाची परवानगी आवश्यक असेल.

नेतुम्बो नंदी-नदैतवाह यांनी नामिबियाच्या पहिल्या महिला राष्ट्रपती म्हणून शपथ घेतली.

मुख्यमंत्री देवेंद्र फडणवीस यांच्या हस्ते 'नवसखी जिल्हास्तरीय सरस प्रदर्शना'चे उदघाटन

कोरटकरांना पोलिसांनीच लपवल असे अमोल मिटकरी म्हणाले आहेत.

नागपुरातील दक्षिण मध्य सांस्कृतिक केंद्रात दोन दिवस चालणाऱ्या नवसखी सरस महोत्सवाचं उद्घाटन आज मुख्यमंत्री देवेंद्र फडणवीस यांच्या हस्ते करण्यात आलं. यावेळी नागपूरचे पालकमंत्री चंद्रशेखर बावनकुळे आणि इतर मान्यवर उपस्थित होते.

संभाजी नगर येथील औरंगजेबाची कबर काढण्याची मागणी करणारी याचिका सामाजिक कार्यकर्ते रतन लथ यांनी मुंबई उच्च न्यायालयात दाखल केली आहे. याचिकेत पुरातत्व विभागाने कबरीला दिलेला राष्ट्रीय विशेष दर्जा हटवावा, अशी मागणी करण्यात आली आहे. औरंगजेब मूळ भारतीय नव्हता, त्यामुळे त्याच्या कबरीला ऐतिहासिक वारसा म्हणून मान्यता देणे योग्य नाही, असा दावा याचिकेत करण्यात आला आहे.

भारतीय शेअर बाजारात ऑक्टोबर 2024 पासून सुरु असलेली घसरण थांबत असल्याचे संकेत मिळत आहेत. विदेशी पोर्टफोलिओ गुंतवणूकदारांनी भारतीय शेअर बाजारात पुन्हा खरेदी सुरु केल्यानं आणि कमी किमतीवर शेअर खरेदी मोठ्या प्रमाणावर झाल्यानं शेअर बाजारात तेजी परतली  आहे. 17 मार्च ते 21 मार्च या काळात सलग पाच दिवसांमध्ये तेजी पाहायला मिळाली. या पाच दिवसांच्या तेजीनं शेअर बाजाराचं चार वर्षांचं रेकॉर्ड मोडली आहे.

छत्रपती शिवाजी महाराज आणि संभाजी महाराज यांच्या विरोधात गरळ ओकून इतिहास संशोधक इंद्रजीत सावंत यांना जीवे मारण्याची धमकी देऊन फरार झालेला प्रशांत कोरटकरचा कोल्हापूर पोलिसांची दोन पथके त्याचबरोबर नागपूर पोलिसांकडून सुद्धा शोध सुरु असताना सापडलेला नाही. त्यांचा अंतरिम जामीन फेटाळण्यात आला आहे. त्याला मुदतवाढ सुद्धा नाकारण्यात आली आहे. 

- हडपसर पोलीस स्टेशनच्या समोर असलेल्या वडाच्या झाडावरून माथेफिरू तरुणाने मारली उडी.

- मूळचा अहमदनगर जिल्ह्यातील रहिवासी असलेला 24 वर्षे तरुण आज पहाटे चढला होता झाडावर.

- झाडावर चढलेल्या तरुणाने मुख्यमंत्र्याची भेट व्हावी अशी मागणी केली होती.

- नागरिकांनी त्याला खाली उतरण्यास विनंती केली असता तरुणाने झाडावर मारली उडी

काल मध्यराञी एकच्या सुमारास शुक्रवार पेठ पोलिस चौकीसमोर एका मालाचा साठा असणाऱ्या गोडाऊनमध्ये आग लागली होती. अग्निशमन दलाची सहा वाहने व जवान यांनी आगीवर नियंञण मिळवत आग पुर्ण विझवली. जखमी कोणी नाही

शरद पवार अजित पवार यांच्यातील वसंतदादा शुगर इंट्युटट मधल्या बैठकीवर संजय राऊत यांनी टीका केली. ते म्हणाले की, यांच्याकडे भेटीसाठी विद्याप्रतिष्ठान असतं. रयत शिक्षण संस्था आहेत. वसंतदादा इंस्ट्युट असतं. आमच्याकडे अशा संस्था नाहीत. राजकारणात संवाद ठेवला पाहिजे या दांभिक गोष्टीवर आमचा विश्वास नाही.

पुण्यात वसंतदादा शुगर इन्स्टिट्यूटची बैठक सुरू आहे. या बैठकीला अजित पवार, शरद पवार, जयंत पाटील, दिलीप वळसे पाटील यांच्यासह इतर पदाधिकारीही उपस्थित असणार आहेत. बैठकीआधी अजित पवार आणि जयंत पाटील यांच्यात बंद दाराआड चर्चा झाल्याची माहिती समजते.

कोरटकर दुबईत पळून गेल्याची माहिती समोर. पाताळात जरी गेला तरी याला शोधून आणणे सरकार समोरचे आता मोठे आव्हान ठरले आहे. नागपूरवरून थेट दुबई गाठण्याकरिता कोरटकरने दंगलीचा आधार घेऊन पळ काढल्याचे एकंदरीत दिसते. गृह खात्याने त्याला तात्काळ मुसक्या आवळुन भारतात आणावे. आमदार अमोल मिटकरी यांची ट्विटद्वारे मागणी -

नागपूरमध्ये झालेला हिंसाचार हा नियोजनबद्धच असल्याचे पोलिसांच्या तपासात उघड झाले आहे. सोमवारी रात्री नागपूरमधील महाल भागात हिंसाचार उफळला होता, हा हिंसाचार नियोजनबद्ध असल्याचे सायबर पोलिसांच्या तपासात उघड झाले आहे. पोलिसांनी याप्रकरणी आणखी दोघांना ताब्यात घेतलं असून चौकशी सुरू आहे. 

- राष्ट्रीय स्वयंसेवक संघाच्या मुख्यालयाची रेकी करणाऱ्या रईस शेखचा जामीन मुंबई उच्च न्यायालयाच्या नागपूर खंडपीठाने फेटाळला आहे

- "जैश ए मोहम्मद" या दहशतवादी संघटनेची निगडित असून तो संपर्कात होता अशी पुरावे पोलिसांनी सादर केले.

- रईस शेख ने 15 जुलै 2021 मध्ये नागपूर रेकी केल्याच पोलीस तपासत समोर आले होते... त्यानंतर तो कश्मीरला निघून गेला होता.

- त्यांनी रेकी दरम्यान संघ मुख्यालय आणि हेडगेवार स्मृती भवन या ठिकाणचे फोटो व्हिडिओ काढून दहशतवादी संघटनांना पाठवले असल्याचा आरोप आहे.

- पोलीस तपासात त्याचे संबंध आतंकवादी संघटनाशी असल्याने तो सध्या कारागृहात आहे. त्यांनी जामीन्यासाठी अर्ज केला असता रईसला जामीन देऊ नये अशी विनंती पोलिसानी न्यायालयाला केली होती.

- दहशतवादी संघटनेची संपर्कात असल्याच्या आधारावर नागपूर खंडपीठाने हा जामीन फेटाळला.

बेळगाव येथे मराठी न बोलल्याबद्दल बस कंडक्टरवर झालेल्या हल्ल्याच्या निषेधार्थ आज अनेक कन्नड संघटनांनी राज्यात सकाळी ६ ते सायंकाळी ६ वाजेपर्यंत बंदची हाक दिली आहे. यादरम्यान खबरदारीचा उपाय म्हणून ठिकठिकाणी पोलिस कर्मचारी तैनात करण्यात आले आहेत.