इंडियन प्रीमियर लीग २०२५ स्पर्धेत रविवारी (४ मे) दुसरा सामना पंजाब किंग्स विरुद्ध लखनौ सुपर जायंट्स संघात धरमशाला येथे खेळवला जात आहे. या सामन्यात पंजाब किंग्सकडून पहिल्या डावात आक्रमक फलंदाजी पाहायला मिळाली.

त्यातही प्रभसिमरन सिंगने तुफानी फलंदाजी केली. मात्र त्याचे शतक थोडक्यात हुकले. या सामन्यात पंजाब किंग्सने लखनौसमोर २३७ धावांचे लक्ष्य ठेवले आहे.

या सामन्यात लखनौचा कर्णधार रिषभ पंतने नाणेफेक जिंकून पंजाबला प्रथम फलंदाजीसाठी बोलवले होते. त्यामुळे पंजाब किंग्स प्रथम फलंदाजीला उतरले. त्यांच्याकडून प्रियांश आर्या आणि प्रभसिमरन सिंग यांनी सलामीला फलंदाजी केली. पण प्रियांशला पहिल्याच षटकात आकाश सिंगने १ धावेवर बाद करण्यात यश मिळवले.

परंतु, नंतर प्रभसिमरनला जोश इंग्लिसने चांगली साथ दिली. इंग्लिस आक्रमक खेळत होता. पण त्याची विकेट अखेर पाचव्या षटकात आकाशनेच घेतली. इंग्लिसने १ चौकार आणि ४ षटकारांसह ३० धावांची खेळी केली.

तो बाद झाल्यानंतर प्रभसिमरनला कर्णधार श्रेयस अय्यरची साथ मिळाली. अय्यरही सध्या चांगल्या फॉर्ममध्ये आहे. त्यानेही आक्रमक पवित्रा घेतला. त्याच्यात आणि प्रभसिमरनमध्ये ७८ धावांची भागीदारी झाली.

पण अय्यरला अर्धशतकासाठी ५ धावांची गरज असताना १३ व्या षटकात दिग्वेश राठीने मयंक यादवच्या हातून झेलबाद केले. अय्यरने २५ चेंडूत ४ चौकार आणि २ षटकारांसह ४५ धावा केल्या.