आपल्यापैकी अनेकजण दररोज वेफर्स खातात. वेफर्स हे चवीला स्वादिष्ट असतात. अनेकदा चित्रपट किंवा वेबसीरिज पाहताना तसेच ऑफिसमध्ये काम करताना सहज खाण्यासाठी वेफर्सचा पर्याय निवडला जातो.
पण दररोज वेफर्स खाणं खरंच योग्य असतं का? वेफर्स खाल्ल्याने तुमच्या शरीरावर नेमके काय परिणाम होतात? तसेच महिन्याभरात आपण कितीवेळा वेफर्स खाऊ शकतो? याबद्दल जाणून घेणार आहोत.
दररोज वेफर्स खाणं हे तुमच्या शरीरासाठी एका ‘स्लो पॉयझन’प्रमाणे काम करते. त्यामुळे जर तुम्ही रोज वेफर्स खाण्याचा विचार करत असाल, तर वेळीच थांबा! कारण हे तुमच्या आरोग्यासाठी अत्यंत धोकादायक आहे.
वेफर्स मोठ्या प्रमाणात मीठ, अतिरिक्त फॅट्स आणि रिफाइंड कार्बोहायड्रेट्स (refined carbohydrates) असतात, जे आरोग्याच्या अनेक समस्यांना आमंत्रण देतात. वेफर्समध्ये जास्त प्रमाणात कॅलरी आणि कमी दर्जाचे फॅट्स असतात. हे पदार्थ सहज पचत नाहीत, ज्यामुळे शरीरात चरबी जमा होते. परिणामी, वजन वाढते. त्यामुळे तुमच्या कमरेचा घेर वाढू शकतो.
वेफर्स तळण्यासाठी वापरल्या जाणाऱ्या तेलात ट्रान्स फॅट्स असतात, जे हृदयासाठी खूप हानिकारक आहेत. हे फॅट्स रक्तवाहिन्यांमध्ये अडथळे निर्माण करतात. ज्यामुळे हृदयावर ताण येतो. यामुळे भविष्यात हृदयविकार होण्याची शक्यता वाढते.
वेफर्समध्ये जास्त मीठ असल्याने रक्तदाब वाढतो. ज्यामुळे हृदय आणि मूत्रपिंडांवर अतिरिक्त दबाव येतो. यामुळे या अवयवांच्या कार्यक्षमतेवर परिणाम होऊ शकतो. वेफर्समध्ये कोणत्याही प्रकारची पोषक तत्वं नसतात. फक्त कॅलरी, मीठ आणि फॅट्स असल्याने शरीराला आवश्यक असलेली जीवनसत्त्वं, प्रथिनं आणि फायबर मिळत नाहीत.
आरोग्य तज्ज्ञांच्या मते, वेफर्स हे प्रोसेस्ड फूड असल्यामुळे ते क्वचितच खावेत. महिनाभरात किती वेळा वेफर्स खावे यासाठी कोणतीही निश्चित संख्या नाही, परंतु दररोज किंवा दर आठवड्याला वेफर्स खाणं टाळायला हवं.
जर तुम्हाला वेफर्स खायचे असतील तर ते महिन्यातून एकदा किंवा दोनदा खावेत. ते खाताना त्याचे प्रमाणही कमी असावे. एकाच वेळी पूर्ण पॅकेट खाण्याऐवजी, थोड्या प्रमाणात खाल्ल्याने आरोग्याला जास्त नुकसान होत नाही.
आरोग्य चांगलं ठेवण्यासाठी वेफर्सऐवजी इतर आरोग्यदायी पदार्थांचा आहारात समावेश करणे आवश्यक आहे. याऐवजी तुम्ही सफरचंद, केळी, संत्री, बदाम, अक्रोड, रोस्टेड चणे खाऊ शकता.
हे पदार्थ चविष्ट आहेतच, पण तुमच्या आरोग्यासाठीही उत्तम आहेत. यामुळे तुमचं पोट भरेल आणि शरीराला आवश्यक पोषण मिळेल. म्हणून, वेफर्सना बाय-बाय म्हणा आणि आरोग्यदायी जीवनशैलीचा स्वीकार करा.