वूमन्स प्रीमियर लीग २०२६ स्पर्धेत (WPL) रविवारी (११ जानेवारी) गुजरात जायंट्सने दिल्ली कॅपिटल्सविरुद्ध ४ धावांनी रोमांचक विजय मिळवला. हा सामना अत्यंत थरारक तर ठरलाच, पण त्याबरोबरच या सामन्यात गुजरातच्या सोफी डिवाईनने (Sophie Devine), तर दिल्लीच्या नंदिनी शर्माने (Nandani Sharma) विक्रमी कामगिरी केली.

या सामन्यात गुजरातने प्रथम फलंदाजी केली, यावेळी गुजरातकडून सलामीला फलंदाजीला उतरलेल्या सोफी डिवाईनने वादळी खेळ केला. तिला दुसऱ्या बाजूने बेथ मुनीने साथ दिली. यावेळी सोफीने पॉवरप्लेमध्ये प्रचंड वेगात धावा केल्या. तिने पॉवर प्लेच्या अखेच्या म्हणजेच ६ व्या षटकात मोठे शॉट्स खेळले.

दिल्लीकडून या षटकात स्नेह राणाने गोलंदाजी केली होती. पण सोफिने या षटकात पहिल्या दोन चेंडूवर चौकार मारले. तसेच नंतरच्या ४ चेंडूंवर सलग चार षटकार मारले. त्यामुळे एकाच षटकात तिने ३२ धावा चोपल्या.

सोफी WPL मध्ये एकाच षटकात सर्वाधिक धावा करणारी खेळाडू ठरली. तसेच स्नेह राणा एकाच षटकात सर्वाधिक धावा खर्च करणारी गोलंदाज ठरली. तिने दीप्ती शर्माला मागे टाकले. दीप्तीने २०२५ मध्ये रॉयल चॅलेंजर्स बंगळुरूविरुद्ध लखनौमध्ये एकाच षटकात २८ धावा खर्च केल्या होत्या.