व्यर्थ ज्ञानेश्वर । व्यर्थ झाला तुका ।
एका झाला मुका । वाचा गेली ॥
व्यर्थ गाडगेबाबा । व्यर्थ तुकडोजी ।
फुकाचे गुरुजी । ठरले आता ॥
शिकविले यांणी । तुम्हा आम्हां सारे ।
विचारांचे वारे । घुमविले ॥
आंधळ्या श्रध्देचे । झाले निर्मूलन ।
विज्ञान विज्ञान । गजर हो झाला ॥
ज्ञानाचे पवन । वाहिले वाहिले ।
इकडुनि आले । तिकडे गेले ॥
पुरोगामी झाला । अमुचा महाराष्ट्र ।
आणि धष्टपुष्ट । विकासाने ॥
सारे काही आता । उलटे पालटे ।
संताची सालटे । निघती देखा ॥
खड्ड्यामाजी गेली । संतांची वचने ।
नेत्यांची भाषणे । मतांलागी ॥
तोचि गा पारधी । ज्याच्या हाती ससा ।
करा खाली खिसा । बाकीच्यांनी ॥
दुनिया कसली । वेड्यांचा बाजार ।
जिथे होते ठार । विवेकबुध्दी ॥
मंत्र तंत्र शक्ती । जारण मारण ।
माया वशीकरण । विज्ञानची ॥
करा आता सुरु । ढोंगाचे स्टार्टप ।
पैशाचे वाटप । खोऱ्याने हो ॥
नीतीअनीतीचा । नको बडिवार ।
परमार्थ उच्चार । करु नका ॥
हरामाचे खोके । बाई नि बाटली ।
हीच गा वाटुली । विकासाची ॥
ढोंगियांचा ढाबा । भोंदूंचेच मठ ।
बेरकी महाखट । जमा झाले ॥
हवाला वेव्हार । जादूटोणा मंत्र ।
हेच नवे तंत्र । विकासाचे ॥
अहाहा तो काय । जादुई आईना ।
पल्याडचे दिसेना । अल्याडास ॥
नाडलेली बाई । बरी बोलवावी ।
तिला लुंगवावी । ऐसपैस ॥
टेबलाखालतें । चाले व्यवहार ।
करा बेदरकार । उघड्यावरी ॥
मेंढरांच्या कळपीं । घुसतो लांडगा ।
हापसे दांडगा । तैसा जेवी ॥
ऐसे गा हे गुरु । देती अनुग्रह ।
जेणे शिष्येसह । मज्जा येई ॥
विकार वासना । हेची गुण माना ।
विकृतास जाणा । उपासना ॥
हपिसाचे मेज । झाला गा पलंग ।
कृपेचाच संग । घडे तेव्हा ॥
बुवाबाजी श्रेष्ठ । किंवा बाईलबाजी ।
येथे दोन्ही काजी । लागलेल्या ॥
बुवाचिया वेठी । बाई पेपरवेट ।
मेजावरी थेट । विराजती ॥
अरे अरे देवा । काय आली वेळ ।
दुष्टांचा सुकाळ । सुरु झाला ॥
बुवाच्या चरणी । पुढाऱ्याचा माथा ।
काय सांगू गाथा । विकासाची ॥
असले कसले । अमुचे हे नेते ।
त्यांना फक्त मते । दिसतात ॥
नंदी म्हणे यांना । माराव्या पैजारा ।
एकालागी बारा । मोजू नये ॥
जोवरी जोरात । असले खरात ।
निघते वरात । वाटे लाज ॥
