Nagpur Crime News : नागपूर शहरातील कळमना पोलीस ठाणे हद्दीत जुन्या वादातून एका तरुणाची निर्घृण हत्या (Crime News) झाल्याची धक्कादायक घटना उघडकीस आली आहे. मृत तरुणाची ओळख रोशन धर्मसिंग उईके अशी करण्यात आली असून, त्याचा जावेद उर्फ लाला याच्यासोबत गेल्या वर्षभरापासून वाद सुरू होता. यातूनच हि घटना घडली असून पुन्हा एकदा नागपूर (Nagpur Crime News) हत्येच्या घटनेने हादरलं आहे. या प्रकरणातील मुख्य आरोपीला अटक करण्यात आली असून अन्य तिघे अद्याप फरार असल्याची माहिती आहे. तर या हल्ल्याची घटना सीसीटीव्ही कॅमेरामध्ये कैद झाली आहे. सध्या पोलीस त्या दिशेने तपास करत आहे.

Nagpur Crime : जुन्या वादातून दोघांमध्ये तणाव, सीसीटीव्हीच्या आधारे मुख्य आरोपीला बेड्या

पोलिसांनी दिलेल्या माहितीनुसार, दोन दिवसांपूर्वी रोशन आणि जावेद यांच्यात पुन्हा एका कारणावरून वाद झाला होता. त्यावेळी रोशनने जावेदला जीवे मारण्याची धमकी दिल्याचे समोर आले आहे. त्यामुळे दोघांमध्ये तणाव निर्माण झाला होता. घटनेच्या दिवशी दुपारी 3 ते 4 वाजण्याच्या सुमारास जावेद आपल्या कूलर बनविण्याच्या कारखान्यात काम करत होता. त्याचदरम्यान त्याला एक फोन आला. 'अर्ध्या तासात परत येतो' असे सांगून तो दुकानातून बाहेर पडला. त्यानंतर तो आपल्या साथीदारांसह कळमना परिसरातील वांजरा वस्ती येथील काच कंपनीजवळ पोहोचला, जिथे रोशन बसलेला होता. यावेळी तेथे पुन्हा दोघांमध्ये वाद झाला. या वादातून जावेदने आपल्या जवळील धारदार शस्त्राने रोशनवर सपासप वार केले. त्यानंतर गंभीर जखमी झालेल्या रोशनचा घटनास्थळीच थोड्या वेळाने मृत्यू झाला. तर हल्ल्यानंतरच आरोपी तेथून फरार झाले होते.

Nagpur Crime News : सीसीटीव्ही फुटेज आणि प्रत्यक्षदर्शींच्या आधारे मुख्य आरोपीला अटक

दरम्यान, घटनेची माहिती मिळताच कळमना पोलिसांचे वरिष्ठ अधिकारी घटनास्थळी दाखल झाले आणि तपासाला सुरुवात केली. सीसीटीव्ही फुटेज आणि प्रत्यक्षदर्शींच्या आधारे पोलिसांनी मुख्य आरोपी जावेदला ताब्यात घेतले असून त्याचे तीन साथीदार अद्याप फरार आहेत. प्राथमिक तपासात 2021 मध्ये यशोधरा नगर पोलीस ठाणे हद्दीतही जावेदने एक गुन्हा केल्याचे समोर आले आहे. मात्र, त्यावेळी तो अल्पवयीन असल्याने त्याला सोडण्यात आले होते. दरम्यान, मृत रोशनवरही परिसरात किरकोळ चोरीच्या घटनांमध्ये सहभागाचे आरोप होते.