राज्याच्या राजकारणात दररोज नवनवीन घडामोडी घडताना पहायला मिळत आहेत. गेल्या काही काळात राज्यात मोठ्या प्रमाणात पक्षांतर पहायला मिळाले आहे. अशातच आता शिवसेनेच्या ऑपरेशन टायगर बाबत चर्चा सुरू झाली आहे. या ऑपरेशन अंतर्गत अनेक बडे नेते शिवसेनेत प्रवेश करण्याची शक्यता वर्तवली जात आहे. अशातच आज ठाकरे गटाच्या एका खासदाराने उपमुख्यमंत्री एकनाथ शिंदे यांच्यासोबत एकाच गाडीतून प्रवास केल्याचे समोर आले आहे. यामुळे राजकारणात खळबळ उडाली आहे. आता यात खासदाराला उद्धव ठाकरे यांनीही फोन केल्याचे समोर आले आहे. याबाबत सविस्तर माहिती जाणून घेऊयात.

उपमुख्यमंत्री एकनाथ शिंदे आणि शिवसेना उद्धव बाळासाहेब ठाकरे पक्षाचे खासदार संजय दिना पाटील यांनी एकाच गाडीतून प्रवास केला होता. काही दिवसांपूर्वी संजय दिना पाटील यांच्या पत्नीचा अपघात झाला होता, त्यांच्यावर मुंबईतील फोर्टीस रुग्णालयात उपचार सुरू आहेत. त्यांच्या पत्नीच्या तब्येतीची विचारपूस करण्यासाठी उपमुख्यमंत्री एकनाथ शिंदे गेले होते. एकनाथ शिंदे निघाले तेव्हा त्यांच्या गाडीत संजय दिना पाटील बसले होते. त्यामुळे राजकीय चर्चांना उधाण आलं आहे.

खासदार संजय दिना पाटील आणि एकनाथ शिंदे यांच्या भेटीनंतर शिवसेना उद्धव बाळासाहेब ठाकरे पक्षाचे पक्षप्रमुख उद्धव ठाकरे यांनी संजय दिना पाटील यांना फोन केला आहे. यावेळी उद्धव ठाकरे यांनी संजय दिना पाटील यांच्या पत्नीच्या तब्ब्येतीची विचारपूस केली. तसेच अपघाताबाबतही विचारपूस केली. याचा एक व्हिडिओही सोशल मिडियावर व्हायरल झाला आहे.

दरम्यान, एकनाथ शिंदे आणि संजय दिना पाटील हे जुने सहकारी आहेत, एक जुने सहकारी मित्र म्हणून रुग्णालयात तब्येतीची विचारपूस करायला जाण्यापर्यंत ठीक होतं. मात्र संजय दिना पाटील यांनी एकनाथ शिंदे यांच्यासोबत त्यांच्या गाडीतून प्रवास केल्यामुळे ऑपरेशन टायगरच्या चर्चेला पुन्हा उधाण आलं आहे. कारण काही दिवसांपूर्वी ठाकरे गटातील काही खासदार शिंदेंच्या संपर्कात असल्याचे समोर आले होते. त्यामुळे आता पुन्हा ही चर्चा सुरू झाली आहे.