Norway's Erling Haaland viral celebration after Brazil win: नॉर्वे संघाने फिफा फुटबॉल वर्ल्ड कप २०२६ स्पर्धेत सोमवारी इतिहास रचला... पाचवेळच्या विजेत्या ब्राझील संघाला त्यांनी २-१ असा फरकाने पराभूत करून स्पर्धेबाहेर फेकले. एर्लिंग हालंडच्या दोन गोलने नॉर्वेला पहिल्यांदा वर्ल्ड कप स्पर्धेच्या इतिहासात उपांत्यपूर्व फेरीत पोहोचवले. या सामन्यानंतर ब्राझीलचा स्टार खेळाडू नेयमार ज्यूनियर ( Neymar) ढसाढसा रडला, परंतु सामन्याच्या शेवटच्या मिनिटाला पेनल्टीवर गोल करून त्याने महान खेळाडू पेले ( Pele) यांच्या विक्रमाशी बरोबरी केली. नॉर्वेने हा सामना जिंकल्यानंतर त्यांचे खास पारंपरिक सेलिब्रेशन करून पुन्हा एकदा जगाचे लक्ष वेधले.

Brazilvs Norway सामन्यात पहिल्या १० मिनिटांत दोन गोल पाहायला मिळाले असते, परंतु तिसऱ्या मिनिटाला नॉर्वेचा गोल ऑफ साईड म्हणून नाकारला गेला. तेच ब्राझीलने पेनल्टीवर गोल करण्याची संधी गमावली, नॉर्वेचा गोलरक्षक ओर्जन नायलांडने भन्नाट बचाव केला. सामन्याचा पहिला गोल ७९व्या मिनिटाला हालंडच्या हेडरने आला आणि त्यात ९०व्या मिनिटाला दुसऱ्या गोलची भर पडली. ब्राझीलसाठी ९०+१० मिनिटाला नेयमारने पेलन्टीवर गोल केला. या गोलसह त्याने एका विक्रमाला गवसणी घातली.

नेयमारने चार वेगवेगळ्या वर्ल्ड कप स्पर्धेत गोल केले आहेत आणि त्याने यासह पेले यांच्या विक्रमाशी बरोबरी केली. त्यांनीही चार वेगवेगळ्या वर्ल्ड कप स्पर्धेत गोल केले होते. या विक्रमात पोर्तुगालचा ख्रिस्तियानो रोनाल्डो ( ६) व अर्जेंटिनाचा लिओनेल मेस्सी ( ५) पुढे आहेत. १९९० नंतर प्रथमच ब्राझीलला उपांत्यपूर्व फेरीत प्रवेश मिळवण्यात अपयश आले आणि या निकालानंतर नेयमारसह संपूर्ण संघ ढसाढसा रडताना दिसला.