मुंबई : देशातील प्रमुख आठ शहरांतील गृहविक्रीत (Homes Sales) गेल्यावर्षीच्या तुलनेत जुलै ते सप्टेंबर या तिमाहीदरम्यान 5 टक्क्यांची घसरण (Drops) झाली असून नवीन लाँचमध्येही या तिमाहीत 25 टक्क्यांची घट झाली आहे. घरांच्या किंमतीत झालेल्या तीव्र वाढीमुळे ही घट झाल्याचे प्रॉपटायगर डॉटकॉमच्या (proptiger.com) ‘रियल इनसाइट रेसिडेन्शियल रिपोर्ट’मधून निदर्शनास आले आहे. प्रॉपटायगर डॉटकॉम हा हाऊसिंग डॉटकॉमचे स्वामित्व असणाऱ्या आरईए इंडियाचाच एक भाग आहे.

या अहवालातील प्रमुख निष्कर्ष पाहिल्यास दिसून येते की, 2023 मध्ये या तिमाहीत 1, 01, 221 घरांची विक्री झाली होती, ज्यामध्ये 5 टक्के वार्षिक घट होऊन 2024 च्या तिसऱ्या तिमाहीत एकूण 96,544 घरांची विक्री झाली आहे. तर देशातील प्रमुख शहरांत तिसऱ्या तिमाहीत 91,863 नवीन घरे लाँच झाली, जी 2023 च्या तिसऱ्या तिमाहीत झालेल्या 1,23,080 घरांच्या लाँचच्या तुलनेत तब्बल 25 टक्क्यांनी कमी आहेत.

विक्री आणि नवीन लाँच या दोन्ही बाबतीत गेल्या वर्षाच्या तुलनेत झालेली घट हा वाढत्या किंमतींना मार्केटने दिलेला प्रतिसाद आहे. एप्रिल-जून तिमाही दरम्यान सामान्य निवडणुकींमुळे घरांची मागणी आणि पुरवठा थंडावला होता आणि जुलै-ऑगस्ट दरम्यान मंजुरीची प्रक्रिया तात्पुरती मंद झाली होती पण ग्राहकांच्या दृष्टिकोनातील सकारात्मकता टिकून आहे. ही बाजारपेठ मूलभूत गोष्टींनी प्रेरित आहे, त्यामुळेच गुंतवणुकीचा एक मार्ग म्हणून रियल इस्टेटला लोकांची पसंती असते असे मत प्रॉपटायगर डॉटकॉमचे बिझनेस हेड आणि आरईए इंडियाचे सीएफओ विकास वधावन यांनी व्यक्त केले.

विक्री वाढेल अशी आशामार्केटच्या कामकाजात आम्ही एक निरोगी संयम बघत आहोत, जो अंतिम यूझरसाठी लाभदायी आहे, कारण त्याच्यामुळे स्थायी विकास संभव होतो. गेल्या काही तिमाहींमध्ये मुख्य बाजारपेठांच्या काही उत्तम भागांमध्ये किंमतीत 3% ते 50% इतकी प्रचंड वाढ झाली आहे. त्याच्यामुळे खरेदी करण्याच्या निर्णयावर परिणाम झाला आहे. पण आम्हाला आशा आहे की, खरेदीदार हळूहळू नवीन किंमती स्वीकारतील. नवरात्रीपासून सणासुदीची सुरुवात उत्साहात झाली आहे, त्यामुळे खरेदीदारांचे खरेदीतील स्वारस्य नव्याने वाढेल आणि विक्री वाढेल अशी आशा आहे असेही वधावन पुढे म्हणाले.
मार्केटमधली तेजी मंदावलीमार्केटमधली तेजी मंदावली आहे आणि एंड-यूझर्ससाठी अधिक स्थिर वातावरण निर्माण झाले आहे. विशेष करून हैदराबाद आणि पुणे येथील विकासकांनी मागणी प्रकारातील बदल ध्यानात घेऊन पुरवठ्याच्या धोरणात बदल केला आहे, तर दिल्ली एनसीआरमध्ये विक्री आणि नवीन लाँच बाबतीत दमदार हालचाल दिसत आहे. सणासुदीचा मोसम नवी ऊर्जा घेऊन येईल अशी अशा आहे. कारण, विकासक आकर्षक ऑफर्स देत आहेत त्यामुळे अलीकडे आव्हाने आलेली असली तरी मार्केट लवकरच पुन्हा गजबजेल असेही ते पुढे म्हणाले.

मुंबई, हैदराबाद आणि पुण्यात मोठी घसरण:2024 च्या जुलै-सप्टेंबर या तिमाहीत दिल्ली एनसीआरमध्ये गेल्या वर्षाच्या तुलनेत विक्रीत 29 टक्क्यांची लक्षणीय वाढ झालेली दिसली आणि गेल्या वर्षातील याच कालावधीत 7,800 घरांच्या विक्रीच्या तुलनेत यंदा त्या तिमाहीत 10,098 घरांची विक्री झाली. एकंदर संख्येच्या बाबतीत मुंबई आघाडीवर असली तरी, 2023 मधल्या तिसऱ्या तिमाहीत 30,299 घरांच्या विक्रीच्या तुलनेत यंदा किंचितशी 1% घट होऊन 30,010 घरांची विक्री झाली.



हैदराबादमध्ये मोठी घट झालेली दिसत आहे. गेल्यावर्षी 14191 घरांच्या विक्रीसमोर यंदा 11,564 घरांची विक्री झाली आहे. अशाप्रकारे विक्रीत 19% घट आली आहे. बंगळूरमधील विक्री 11% ने कमी झाली आहे, गेल्या वर्षी या तिमाहीत 12,588 घरांची विक्री झाली होती तर 2024 च्या या तिमाहीत मात्र 11,160 घरेच विकली गेली. त्याचप्रमाणे, अहमदाबादेत गेल्या वर्षीच्या तुलनेत 9% घट होऊन घरांच्या विक्रीची संख्या गेल्या वर्षीच्या 10,305 वरून 9,352 वर आली आहे.

नवीन लाँचची तुलना:2023 च्या तिसऱ्या तिमाहीच्या तुलनेत 2024 च्या तिसऱ्या तिमाहीत दिल्ली एनसीआरमध्ये नवीन लाँचच्या बाबतीत 76% इतकी दमदार वाढ झालेली दिसली. मागच्या वर्षांच्या 6810 घरांच्या तुलनेत यंदा तब्बल 11,955 नवी घरे लाँच झाली. यामधून विकासकांचा जबरदस्त आत्मविश्वास दिसून येतो.

याच्या उलट, नवीन घरांच्या पुरवठ्याच्या बाबतीत मुंबईत 13% घट झालेली दिसली. गेल्या वर्षीच्या 35,923 घरांच्या तुलनेत यंदा 31,123 घरे लाँच झाली आहेत. हैदराबाद येथे गेल्या वर्षाच्या तुलनेत 58% इतकी तीव्र घट झाली आहे. नवीन लाँच होणाऱ्या घरांची संख्या मागील वर्षी 20,481 होती तर यंदा ती फक्त 8,546 इतकी आहे. पुण्यातील नवीन घरांचा पुरवठा देखील 36%ने कमी होऊन 31,543 वरून 21,287 वर आला आहे. कोलकाता येथे मागील तिमाहीच्या तुलनेत वाढ झालेली असली तरी मागील वर्षातील याच तिमाहीच्या तुलनेत 61% ची घट झाली आहे. 2023 च्या तिसऱ्या तिमाहीत 3,850 नवी घरे लाँच झाली होती तर यंदाच्या तिमाहीत फक्त 1,516 नवीन घरे लाँच झाली आहेत.