सोमवारी (७ एप्रिल) इंडियन प्रीमियर लीग २०२५ स्पर्धेतील २० वा सामना मुंबई इंडियन्स विरुद्ध रॉयल चॅलेंजर्स संघात खेळवला जात आहे. मुंबईतील वानखेडे स्टेडियमवर हा सामना सुरू आहे. या सामन्यात बंगळुरूने मुंबईसमोर २२२ धावांचे मोठे लक्ष्य ठेवले आहे.

या सामन्यात मुंबई इंडियन्सने नाणेफेक जिंकून प्रथम गोलंदाजी करण्याचा निर्णय घेतला होता. त्यामुळे बंगळुरू संघ प्रथम फलंदाजीसाठी मैदानात उतरले.

बंगळुरूकडून फिल सॉल्ट आणि यांनी डावाची सुरुवात केली. पण नेहमीप्रमाणे ट्रेंट बोल्टने पहिल्याच षटकात विकेट घेतली. त्याने फिल सॉल्टला दुसऱ्याच चेंडूवर ४ धावांवर असताना त्रिफळाचीत केले. पण त्यानंतर विराट कोहली आणि देवदत्त पडिक्कल यांनी मुंबईच्या गोलंदाजांना चांगलाच संघर्ष करायला लावला. त्यांनी ९१ धावांची भागीदारी केली.

ही भागीदारी धोकादायक ठरत होती, कारण जवळपास १० च्या धावगतीने त्यांनी धावा जोडल्या होत्या. अखेर ९ व्या षटकात विघ्नेश पुथुरने पडिक्कलला ३७ धावांवर विल जॅक्सनच्या हातून झेलबाद केले.

पण, त्यानंतरही विराट कोहली आणि कर्णधार रजत पाटिदारने लय गमावली नाही. त्यांनी आक्रमक फलंदाजी केली. विराटने त्याचे अर्धशतक करण्यासोबतच १३ हजार टी२० धावाही पूर्ण केल्या. तो असा पराक्रम पहिला भारतीय ठरला. त्याच्यात आणि पटिदार यांच्यातही अर्धशतकी भागीदारी झाली.

पण १५ षटकात मुंबईचा कर्णधारच संघाच्या मदतीला धावला. विराटला आधी बाद केले. विराटचा झेल नमन धीरने घेतला. विराटने ४२ चेंडूत ८ चौकार आणि २ षटकारांसह ६७ धावांची खेळी केली. याच षटकात हार्दिकने धोकदायक ठरू शकणाऱ्या लियाम लिव्हिंगस्टोनलाही शून्यावरच माघारी धाडले.